Juan Guaidó intentando ingresar a la Asamblea Nacional 07-01-2020

Estadonan Uni lo tuma medida si tin un escalada di e crisis na Venezuela y si detene e lider opositor Juan Guaido. U funcionario di gobierno Mericano a declara esaki ayera, despues di e sucedido na edificio di Asamblea Nacional, unda forsanan uniforma di gobierno di Maduro a impedi entrada di Guaido y otro miembronan di oposicion na e palacio legislativo.

Subsecretario adhunto di Departamento di Estado pa Cuba y Venezuela, Carrie Filipetti, a bisa periodistanan cu si siguridad di Guaido ta na riesgo, Washington lo aumenta su presion pa percura pa salida di Maduro.

“A mira tacticanan cu gobierno di Estadonan Uni a usa den curso di aña pasa. Si tin algo manera un escalada y un aresto di Guaido, mi ta kere cu lo mira incluso accion adicional hopi mas leu di loke nos a promove te awor,” el a declara.

Ayera Guardia Nacional a impedi na un prome momento cu Guaido, ratifica diadomingo como presidente di parlamento pa 100 di e 167 miembronan di Asamblea Nacional, por a drenta na Palacio Legislativo, mientras e diputado rival Luis Parra, autoproclama hefe di e parlamento, tabata dirigi e sesion.

“Si Luis Parra y otro 18 persona dicidi di keda den e edificio di Asamblea Nacional, bon, nan no tin quorum, nan no tin autoridad pa ta eynan, nan no a keda eligi pa e puesto, di acuerdo cu constitucion Venezolano,” Filipetti a expone, señalando cu pa Estadonan Uni lo unico cu ta conta ta e Asamblea Nacional eligi democraticamente na 2015 y presidi desde januari 2019 pa Guaido. “Esaki ta algo cu nos ta siguiendo di cerca,” el a observa.

Guaido finalmente a logra drenta Palacio Legislativo ayera y por a keda huramenta como presidente di parlamento Venezolano.

Elliott Abrams, alto funcionario di Departamento di Estado dedica na e crisis na Venezuela, a reitera dialuna pasa cu ta existi e posibilidad di un intervencion militar na Venezuela.

LEAVE A REPLY

Please enter your comment!
Please enter your name here