Di diferente banda politico na Venezuela a bay felicitacion pa Joe Biden y Kamala Harris despues di anuncio di nan victoria den eleccion na Merca . Presidente de facto Nicolas Maduro tambe a felicita nan diasabra pasa, mescos cu presidente interino Juan Guaido. Tambe Leopoldo Lopez a mustra satisfaccion cu eleccion di Biden y Harris fin di siman pasa.
Tur e actornan politico di Venezuela ta di un of otro manera convenci cu e yabi pa atende e crisis grave na Venezuela ta na Cas Blanco. Y tur tabata warda pa varios luna riba e fecha di eleccion como si ta trata di un momento decisivo promer di dal e siguiente paso. E pregunta ta si e cambio di presidencia. E propaganda di derecha politico na Merca, Caracas y Colombia, a trata di proyecta un equivalencia falso entre continuacion di Trump den gobierno y e fin di Chavismo na Venezuela. Di otro banda, e felicitacionnan di banda di Chavismo, si nan ta basa riba speranza di un suavisacion di e politica Mericano contra Chavismo, esey no ta realistico. E realidad ta hopi mas compleho y e proximo presidente por duna e conflicto un cambio di rumbo, pero no mester.
Tempo cu Trump a gana eleccion na 2016 den gobierno di Maduro varios dirigente a keda alivia. E splicacion di esey ta cu tabata mira den cierto parti di izquierda anti-establishment democrata mas disposicion pa un politica intervencionista cu den e maneho di Trump, basa riba un retiro di escenario internacional basa riba e pensamento di no hunga e papel mas di agente policial internacional. Esey no tabata asina y riba e continente Mericano no a cambia tanto den e politica di semper pa mantene control geo-politico. Y esey tabata implica tambe actua contra e regimen cu a cuminza mustra su radicalismo socialista, expresa den nan alianza cu por ehemplo Cuba y Iran. Ta dificil imagina un cambio fundamental den e strategia di anti-comunismo di varios decada, sea gobierno republicano o democrata na Merca.
