Bisiñanan di e instalacionnan di Pdvsa na Guanta, estado Anzoategui, a bira victima ora un explosion, sigui pa un candela den un dam di crudo di Pdvsa.
Na principio a pensa cu tabata un problema di lamper, ya cu tabatin un onda tropical pasando na oriente di e pais, cu por a origina e candela diasabra pasa. Sin embargo, e dam di crudo den e refineria El Chaure, situa na Guanta, lo a desborda y bay den direccion di e viviendanan den vecindario, ta e causa probabel di e siniestro cu a costa bida di un pareha y nan yiu muhe di 4 aña. Tambe un homber a keda cu kemadura riba 90% di su curpa interna na Hospital Universitario Dr. Luis Razetti.
Carlos Michelangeli, diputado di Asamblea Nacional pa estado Anzoategui, a denuncia algun ora prome cu e sucedido e desbordamento di crudo na e Terminal di Almacenamento y Despacho di e Compleho Petrolero di estado Anzoategui. “Loke a sosode na municipio Guanta ta refleho di e gravedad cu nos ta enfrenta. Autoridadnan di Pdvsa no ta sigui e protocolnan y no ta realisa e saneamento di e damnan di residuo. Ta evidente e inoperatividad di e instalacionnan di Pdvsa, entre hopi otro iregularidad dentro di e industria,” el a señala riba Instagram, despues di e explosion.
Diadomingo, despues di haci un recorido den alrededor di e refineria, Michelangeli a informa di e daño ecologico haci pa e candela cu a expande pafo di e refineria afectando como 53 hectarnan di mangel. Actualmente ta wardando riba e reporte oficial di Cuerpo di Investigacion Cientifico, Penal y Criminalistico (Cicpc).
