Ayera mainta tempran, un biaha mas empleadonan di Parke Nacional Arikok (FPNA) a bay den accion. E malcontento aki tin di haber cu e directiva nobo di e parke no kier aparentemente respeta e acuerdo cu e trahadonan tin pa calcula nan aumento di salario.

Secretario General di SEPPA, Magaly Brito ta mira cu directiva a adopta un posicion intransigente, y no kier coregi e fout cometi riba e forma con ta haci e calculacion di e salario di e trahadonan. A pesar cu nan a yega di sinta cu representante di e directiva cu ta mira e foutnan cometi, y te hasta dia 23 di mei a wordo duna otro proposicion, pero diripiente, directiva di FPNA ta para riba nan posicion inicial.

“Ta nifica cu ta bay ta discutiendo cu hende na mesa, cu mañan nos no sa si Parke ta tene nan mes na e palabracion na e mesa si of no,” el a declara. Tambe e ta mira cu e problema por surgi despues cu nan ta bay negosha cu contract colectivo (CAO).

SEPPA ta mira cu directiva di FPNA no ta mantene nan mes na nan palabra. E sindicalista ta kere cu den tur e decision cu bo por tuma, percura pa bo ta husto. E ta kere cu -den caso directiva di e parke- no ta pasobra e fout cu a wordo cometi cu e salario di e trahadonan ta nifica placa extra cu bo tin cu paga e trahadonan aki, bo ta bisa cu bo no ta haci e mas.

Acuerdo
Brito a bisa cu cada biaha FPNA ta confronta diferente problema. Un di nan tin di haber cu e cambio di director cada biaha, y ultimamente ta relaciona cu e cambio di e directiva. E aña aki nan a cuminsa e discusion cu e directiva nobo di FPNA relaciona cu varios asunto, pero uno prioritario ta riba calculacion di salario.

SEPPA, representando e trahadonan di FPNA, a dicidi di pone un banda e puntonan cu nan tin pendiente, y nan a traha lista di esunnan cu ta haya mehoracion di salario. SEPPA a traha riba e lista como prioridad, debi cu e ta toca salario di e trahadonan. Pero tambe nan derecho cu nan kier mira pa e keda cla.

Segun sindicalista Brito, esaki a tuma basta tempo y awor nan por bay riba dje. Esaki despues di varios discusion cu nan a sostene basa ariba e sistema di antes, cu ta calcula e salario di e trahadonan of sistema di gobierno.

E sistema di antes ta parti di mayoria di e acuerdo cu e trahadonan di parke tin, ora cu nan a bay di e status di LVV pa bira un fundacion. Segun secretaria di SEPPA, nan por mira si cu e directiva nobo no lo kier respeta esaki, y nan ta argumenta cu gobierno mes no ta haci e calculacion. Pues nan a dicidi di kita e sistema aki sin tene cuenta cu tin fout den e calculacion di salario cu a bin ultimamente.

Mirando tur e corespondencia cu nan a yega di comparti tanto di e directornan y e directivanan anterior di FPNA, con nan mes mira e situacion di e grupo cu a bay den calculacion di salario cu ta indica cu e foutnan mester wordo coregi. Nan ta e mesun puntonan cu nan ta exigi aworaki pa coregi e foutnan aki, segun Brito.

E ta haya cu e sistema cu nan a traha ta e forma pa nan por mira mas miho con nan situacion tabata, si e eror aki no a wordo cometi. Sinembargo directiva di FPNA no kier a admiti esaki pa medio di un carta cu nan a manda na mei ultimo, mustrando como cu ‘e cuenta a caba.’

Accion
SEPPA dicidi di bisa basta riba e discusion na mesa y exigi pa nan cuminsa respeta locual ta condicionnan cu e trahadonan tabatin derecho riba dje. SEPPA no tin problema si den caso directiva di FPNA ta bisa cu ta gobierno no kier haci e calculacion aki, pasobra nan ta distancia nan mes for di e fundacionnan. Pero si e sindicato ta mira cu e directiva como dunado di trabou mester por respeta nan trahadonan, splicando nan debidamente di e cambio, cu mester bay no mas malo di locual e tabata ta.

Igualmente pa SEPPA ta importante pa e trahadonan ta na haltura di e forma con lo calcula e mehoracion di nan salario den futuro, si nan tin derecho riba promocion si of no, etc., pues nan ta puntonan cu SEPPA ta haya cu mester tin claridad. “Sino e ta cay riba tur hende,” el a bisa.

SEPPA kier duna directiva di FPNA un chens pa recapacita, pero tambe nan lo informa e minister en cuestion riba e problema aki. Brito ta kere cu e mandatario responsabel di e misterio caminda FPNA ta resorta, mester por sa di e situacion aki. Por ta e situacion aki por cumbini gobierno cierto momento, ora cu nan ta distancia nan mes di un fundacion. Pero e ta haya cu e minister tin un obligacion tambe pa papia cu e directiva y aclaria henter e asunto aki di calculacion di salario debidamente.

 

 

 

LEAVE A REPLY

Please enter your comment!
Please enter your name here