(LaPatilla) – Venezolanonan ta considera cu mester duna prioridad na implementacion di un plan pa e mehoracion di infrastructura escolar, un estudio presenta pa e Fondo di Nacionnan Uni pa Infancia (Unicef) na Venezuela a revela.
Ariba su cuenta di Twitter, e organisacion a informa cu e representante di Unicef Venezuela, Abubacar Sultan, a participa den e presentacion di e Consulta Global pa e Transformacion Educativo (TES) e cual a conta cu e participacion di mas di 173 mil persona di e pais, cu tambe a pidi un aumento den e cobertura di e programa di alimentacion escolar y acceso na internet na espacionnan educativo.
Sultan a expone e resultadonan di e consulta aki dilanti e representante di e Ministerio di Educacion y a destaca e importancia di e intercambio di bon practica, e aprendisahe di otro experiencianan y e compromiso di e liderazgo den e implementacion di e recomendacionnan.
Igualmente e organisacion a ratifica su compromiso cu e aprendisahe di e mucha y hobennan Venezolano a traves di e implementacion di su programa di educacion y fortalecemento di capacidadnan den e sector educativo.
Den luna di juli, Unicef a celebra su aniversario number 55 di trabou na Venezuela cu un feria pa haci promocion di e derechonan di mucha, celebra den un parke publico na Caracas.
Unicef a cuminsa cu su operacionnan na Venezuela na 1967, cu e firmamento di un acuerdo basico di cooperacion pa compaña e esfuersonan di atencion na e necesidadnan di e muchanan y promove nan derechonan.
