Union Europeo(UE) a adverti ayera cu por impone sancion nobo contra Venezuela, si ta considera cu democracia ta sigui mina, despues cu gobierno di presidente Nicolas Maduro a convoca eleccion pa luna proximo, den cual e principal bloke opositor no lo participa.

Ehefe di Politica Exterior di UE, Federica Mogherini, a bisa den un comunicado cu e ta lamenta e forma den cual e gobierno di Maduro a convoca eleccion presidencial y legislativo pa dia 20 di mei, sin un consenso tocante e “condicionnan pa un proceso electoral creibel y inclusivo.”

Venezuela ta pasando den un crisis economico y social cu tin miyones di persona sufriendo pa escasez di alimento y medicina, cu un hiperinflacion y un creciente insiguridad, cu segun opositornan ta resultado di e politica di gobierno di Maduro.
E recesion a causa cu un cantidad calcula di tres miyon di persona a mira nan mes obliga di bandona nan pais.

Maduro, cu ta culpa e guera economico pa e crisis cu segun su persona, oposicion y Merca ta hibando, ta buscando su reeleccion den e eleccion di luna proximo.

E principal bloke opositor a dicidi di no tuma parti na e eleccion y dos di e lidernan mas popular bao di oposicion a haya prohibicion di gobierno pa participa como candidato.

Union Europeo lo vigila di cerca e tereno di proceso electoral y e acontecimentonan relaciona cu esaki, y ta dispuesto pa reacciona cu medida apropia pa cualkier decision o accion cu por continua minando democracia, e papel di ley y e situacion di derecho humano den e pais.”El a añadi cu tur e partidonan mester por participa na eleccion husto.

Siman pasa, e vice-presidente Mericano Mike Pence, a bisa e lidernan regional cu nan mester haci mas pa isola Maduro y cu Washington no lo keda sin haci nada mientras e pais ta cay for di otro. UE a impone algun sancion contra Venezuela aña pasa, acusando Maduro di perhudica derecho humano.

E menasa di UE a yega un dia despues cu Spaña y Venezuela a acorda recompone nan relacionnan diplomatico cu e regreso di nan embahadornan, varios luna despues di e enfrentamento cu a conduci na e retirada di nan representante.

(fuente:lapatilla.com)