Home Local Veredicto 2 mei den caso ABC contra Pais Aruba pa tereno The...

Veredicto 2 mei den caso ABC contra Pais Aruba pa tereno The Mill

484

Ayera a sigui e caso  entre Aruba Bird Conservation (ABC) y Land Aruba unda cu ABC a pidi pa cera e caso, pasobra nan ta di opinion cu Land Aruba ta actuando robes pa a rosa un pidi tereno cu ta considera como un area protegi. Land Aruba di nan banda a presenta un argumento nobo indicando cu ta trata di erfpacht y no tereno protegi.

E caso di e tereno di e wetland situa banda di area na the Mill a sigui ayera den corte, unda cu ABC un poco skerpi a pidi pa cera e caso y pa duna un sentencia. Land Aruba/DIP su representantenan no por a contesta mayoria di e preguntanan di hues.

E caso a cuminsa unda cu ABC -representa pa nan abogado Geert Rep – a señala cu dia 22 maart ultimo nan a bay Kadaster pa verifica si e tereno (2C 2918), cu aparentemente a ser rosa pa algun actividadnan di construccion, en berdad ta cay bao di hotel the Mill/Elmsford. Paso segun sr. Rep, e tereno ta considera un zona berde di e wetland desde 2009. Aki a resulta cu en berdad e tereno ta cay bao di the Mill te cu dia 22 maart. Pero cual ta straño ABC ta bisa, pasobra e NV di the Mill a bay failliet desde 1993.

Desde 2009 e tereno 2C 2918 ta considera zone berde den e  Ruimtelijk Ontwikkelings Plan (ROP). Esaki tabata un motibo suficiente pa a pidi pa para tur actividad di construccion, segun e fundacion.  E tereno aki ta situa entre the Mill cu ex- House of Cheng. E tereno ta ser considera un area protegi y parhanan -special shoconan-  tin nan neishi eynan, asina ABC ta trece dilanti.

Argumento nobo di Pais Aruba
Land Aruba no tabata tin mucho pa presenta ayera, solamente un argumento nobo unda cu nan ta haya cu rosamento di un pida tereno no ta ser considera algo cu ta cay bao di actividadnan di construccion. Y cu ta straño pa nan como cu ta dificil pa nan entrega e tereno sin cu ROP a presenta su manehonan specifico y ta bisa claro kico por of no por. DIP ta haya cu ROP mester presenta un ROPV cu ta bisa Ruimtelijk Ontwikkelings Plan met Voorschriften, dus cu reglamentonan specifico cu ta bisa kico ta nan maneho y kico por wordo haci segun e maneho.

E discusion entre e dos partidonan aki ta cu DIP ta bisa cu un parti ta ser considera zona perde di e wetland y otro parti ta erfpacht. Segun DIP nan ta haya cu ROP ta actuando sin un maneho cu ta bisa kico gobierno por of no por sin cu mester daña naturalesa. Segun DIP, ROP mester implementa manehonan concreto pa uzo di e tereno, paso di parti di DIP, segun gobierno no tin un maneho ainda cu sancionnan pa bisa cu nan no mag di rosa un tereno.

Hues tambe a expresa cu e ta haya e situacion straño y a puntra pa kico a rosa e tereno, si e no ta ser considera actividad di construccion. Finalmente a dicidi pa duna veredicto riba 2 mei.