(AP) – Video di Jesse Williams sin paña a ser captura riba stage di un escena den cual e actor tabata baña durante un show riba Broadway a ser publica online, causando critica di e productornan y e union cu ta representa actornan y manager di escenario.

“Nos ta condena den e termino mas fuerte posibel y e creacion y distribucion di fotografia y videonan di nos miembronan durante un escena unda cu nan ta expone nan curpa,” Kate Shindle, president di Actors Equity Association. “E persona cu a haci esaki no solamente tabata sa cu nan ta filmando un actor si nan consentimento, pero tambe tabata violando explicitamente e teatro su prohibicion di grabacion y distribucion.”

Williams ta un di e actornan den e show di Broadway “Take Me Out,” cual ta Richard Greenberg su exploracion di kico ta pasa ora cu un atleta di Major League Baseball ta revela cu e ta homosexual, explorando e manera cu esaki ta afecta y ekipo y ta ilustra prehuicionan toxico. Williams a gana un nominacion pa un Tony Award riba dialuna danki na su actuacion como e personahe aki.

Second Stage Theater, cual ta e compania cu ta produci e show aki, ta usa Yondr pouches pa proteha e actornan. Miembronan di e audiencia cu yega e teatro mester entrega nan celular, cual despues ta ser poni den un tas cu lock te na final di e programa. E compania a bisa cu nan lo mehora nan siguridad y pone un control mas estricto mirando cu tin luga pa violacion di e reglanan aki.

“E acto di tuma potret di cualkier persona den un momento unda cu nan ta vulnerabel y sin paña sin cu nan duna nan consentimento ta sumamente cuestionabel y por tin consecuencianan legal hopi severo,” Second Stage a declara. “E acto di publica esaki riba internet ta un acto fies y ta un violacion inaceptabel di e confiansa entre e actor y e audiencia cu ta crea den e comunidad di teatro. Nos ta activamente buscando manera pa remove e video y imagennan aki for di internet, y nos ta pidi pa ningun persona participa den e distribucion di e imagennan aki.”

 

LEAVE A REPLY

Please enter your comment!
Please enter your name here