E vacuna contra COVID-19 no ta bay cambia DNA di hende. E ta cambia e DNA di e virus. Asina Dr. Byron Martina, virologo y experto global riba e tema di virus a bisa Bon Dia Aruba.

Dr. Martina, di Corsou, ta considera un di e expertonan principal na Hulanda y na mundo riba e tema di virusnan exotico, manera Dengue, Zika, Chikungunya y otro, y ta asisti e Outbreak Management Team di Hulanda. Su hefe directo, dr. Marion Koopmans no solamente ta miembro di e Outbreak Management Team, e ta un di e 10 expertonan internacional cu ta investigando e origen di COVID-19 pa Organisacion Mundial di Salud.

Ademas di su trabou como parti di e Departamento di Virologia di Centro Medico di Universidad di Erasmus na Rotterdam, dr. Martina ta e Director y CSO (Chief Scientific Officer) di Artemis One Health Research Foundation cu ta hiba investigacionnan riba virus rond mundo. Otro experto cu kizas publico na Aruba conoce ta dr. Ab Osterhaus cu ta fungi como consehero di Artemis.

Dr. Martina a enfoca hopi atencion riba e desaroyo di Chikungunya, Dengue y Zika entre otro na Corsou y islanan ruman. Y awor su atencion ta SARS-COVID -2, esta e coronavirus cu ta causa e malesa COVID-19.

Con e coronavirus ta traha

Byron Martina na comienso a splica cu mester mira un virus como un bala, manera un baseball, rondo pero cu ta cubri cu yen di yabi pa “habri porta di un cel pa asina e por duplica su mes. Un virus e ora ta bira dos, sigui pa 4. E momento cu e virus drenta un cel, e ta un infeccion. Contagio ta ora cu e virus ta sali bek di e cel y ta bay pa otro hende.”

Den otro palabra, ora un virus drenta un cel, duplica su mes, e no a infecta ningun otro hende. “E virus ta haci su esfuerso pa kibra e cel cu el a drenta.” Dr. Martina a splica cu mester mira e virus como un forsa pa destrui un cas. Na momento cu e logra kibra tur cos di e cas, e persona ta cuminza sinti malo.

Pa e persona aki por traspasa e virus pa otro hende, e mester tin un cantidad grandi di virus den su curpa. Por ehempel pa e coronavirus, e ta rekeri un presencia di 10 mil virus of mas. “Ta e momento cu e cas ta basha abou.” Pero realidad tambe ta cu tin hende no ta sinti malo mes. Y esey ta pasobra por considera cu cierto hende tin cel cu ta comparabel cu cas di palo y otro hende tin cel cu ta comparabel cu cas di beton. E virus lo por kibra bentana of porta, pero e cas ta keda para fuerte.

Vacuna MRNA y miedo

Na 2020 a cuminza traha riba un vacuna contra e coronavirus. A uza un tecnologia nobo cu ta haci e vacuna algo totalmente diferente cu locual ta e vacuna cu mayoria hende ta custumbra cune, cu ta mas bien parti di e virus, manera polio cu ta permiti e curpa traha su anticurpa contra e virus peligroso aki.

Realidad ta cu tin hopi reserva rond mundo contra e vacuna. Segun Dr. Martina, esaki ta pa motibo di un cantidad di informacion robes cu ta keda difundi pa tur tipo di medio, sigur media social,cu ta enfoca mas riba e aspectonan negativo.

“E parti di poblacion cu mas mester di e vacuna ta esnan cu ta core e risico mas grandi, por ehempel hendenan cu tin problema cu curazon, ta diabetico, of asmatico, of hendenan di edad halto. E hendenan ey mester di e vacuna. Esnan mas jong y mas saludabel no mester di e vacuna. Pero un cos mi ta bisa ta cu ora ta haci hopi investigacion pa yega na un vacuna. Es mas, e ta miho pa e persona tuma un vacuna cu tuma remedi. Un vacuna ta mas sigur cu remedi, pasobra ta realmente haci hopi test prome cu pone riba mercado. Un vacuna como tal ta relativamente sigur.”

Pero semper tin algun hende cu por core risico, dr. Byron Martina a enfatisa. “ Mester compar’e cu pica di un abeha. Gran mayoria hende cu haya pica di un abeha lo no sinti mucho efecto. Pero toch tin algun cu por muri di e pica. Esey ta pa motibo di e reaccion di e sistema inmunologico di un persona. Uno ta bira alergico pa stof y otro pa pollen. Alergia tin di e haber con e curpa ta reacciona. Pues den poblacion tambe tin un grupo cu ta reacciona diferente riba un vacuna. Esey no por scapa di dje. Mas tanto hende cu vacuna, mas lo haya hende cu ta reacciona diferente, mescos cu e caso di un hende cu ta haya un pica di un abeha. Pero e no ta hopi. Y esey no ta un motibo pakico un hende mester rechasa e vacuna.”

DNA

Dr. Byron Martina ta lamenta con personanan sin conocemento ta comenta riba e vacuna sin sa e tecnologia su tras y tur e test cu tabata su tras. Media tambe ta tuma e storianan aki y consecuentemente, tin yen di storia robes. Entre otro, cu e storia cu e vacuna contra COVID-19 lo ta cambia DNA di hende. “Tanto hende y tambe virus, tin su DNA. Den e DNA tin tur e informacion. E colo di cuero, cabey, tur ta informacion warda den e DNA. Proteina ta transmiti e informacion aki. Pero pa pasa e informacion di e DNA mester di un medio y esey ta e MRNA. E MRNA ta locual curpa tin pa traha e proteina. Esey ta locual a traha e vacuna cune. A traha un MRNA cu ta keda traslada den e proteina di un virus. E curpa ta traha anticurpa contra e proteina di e virus y asina ta brinda proteccion. E MRNA ta e intermedio entre e DNA y proteina. Pero e MRNA cu ta den e vacuna ta di e virus, y no di hende. Pues, e MRNA aki no por cambia DNA di hende. E ta dirigi specifico pa e virus.”

Variantenan ta keda SARS-COVID 2.

Na e momentonan aki tin diferente variante di e virus cu a haci su entrada na Wuhan, China den 2019. Tabata un coronavirus cu a haya e nomber SARS-COVID-2, cu a causa e malesa COVID-19. Ya na 2020 a ripara cu e virus cu a afecta Italia tabata un poco diferente cu esun di Wuhan, y awor na 2021, a detecta mas variante, di Inglatera, Brazil y Sur Africa. Segun dr. Martina, tur ta e mesun coronavirus y tur ta causa e infeccion COVID-19.

“E yabinan riba e bala, pa habri e porta di e cel a cambia den cada variante. Pero ta keda mesun virus. Of, por hasta ilustra cu color. Ban bisa cu e prome virus tabata blauw scur y awor e variante ta blauw cla. Esey ta locual nos ta yama e variante.”

Vacuna ta keda efectivo contra variante?

Locual no ta sigur si e vacuna nobo ta traha mes efectivo contra tur e variantenan. “Nos conoce varios coronavirus. E SARS coronavirus ta nobo. E otro coronavirusnan cu nos conoce tambe tin variante, y no tur biaha haya uno ta proteha contra e otro.” Dr. Byron Martina a splica cu un vacuna por proteha un hende na diferente nivel. E por proteha di keda infecta, of di bira malo. “Nos ta kere cu e vacuna ta proteha particularmente pa un hende bira malo. E no ta proteha di keda infecta, sino contra e malesa. Pues, si keda infecta cu un otro variante, kizas no ta bira mes malo. Esey ta nifica cu e vacuna cu tin por proteha hasta contra e variantenan.”

E vacuna cu a keda desaroya lo stroba cu ta plama e prome coronavirus cu ta causa COVID-19. Locual e no ta haci ta stroba pa plama e variantenan. “E no ta stroba cu ta transmiti, sino cu no ta bira asina malo.”

Dr. Byron Martina a bisa cu mutacion, variacion den virus ta algo natural. “E ta normal. E virus ta sobrevivi door di multiplica y traha copia di su mes. Den e proceso di traha copia di su mes ta bin fout. Y e ‘foutje’ ey nos ta yama variante.”

Pa Dr. Martina, un virus por bira mas peligroso cu e original si e haya mas ‘yabi’ pa drenta y por kibra mas cas pareu. Pero di otro banda, segun cientifico, ainda ta dificil pa determina si y cua di e variantenan ta mas peligroso cu otro. Pa realmente determina esey, mester mas analisis, segun Dr. Martina.

Virus ta algo normal, salud publico mester ta prepara

Dr. Byron Martina ta enfatisa na comunidad pa realisa cu virus no ta algo nobo y COVID-19 lo no ta e ultimo malesa ocasiona pa un virus. Semper lo tin virus nobo. Asina a bin Zika y Chikungunya y den futuro lo bin otro. Cada biaha lo bin un virus nobo. “Awor aki nos tin e SARS. No por pronostica cua ta e otronan cu ta bay bin.”

Problema ta cu hende individual no por proteha su mes contra un virus nobo. Pero un pais si. E tarea di un pais ta pa percura cu e infrastructura medico y di salud ta suficiente ekipa pa atende cu un virus nobo. “COVID-19 a siña mundo henter cu sistema di salubridad publico mester ta bon hinca den otro y cu mester tin e capacidad di escala mesora. Por ehempel, cu por escala camanan di cuido intensivo den corto tempo. E ta nifica inversion . Mester hinca mas placa den salubridad publico. Ta un di e lesnan cu a siña di COVID-19,” e virologo a conclui.