Voogdijraad: ‘Bienestar di nos muchanan ta importante’

Voogdijraad ta duna splicacion cu nan lo sigui cu nan trabou. E departamento a haci evaluacion pa continua cu e trabou mas esencial, pues ‘proteccion di menor di edad ta sigui’.

Director di Voogdijraad Aisca Berkmeyer ta duna di conoce cu nan ta contribui manteniendo nan distancia social y disminuyendo cantidad di trahado na trabou. “Nos a haci evaluacion mas esencial y esey ta nifica e proteccion di menor di edad ta sigui.”

Berkmeyer a bisa cu den circunstancianan actual no por perde for di bista e situacion di muchanan vulnerabel, incluyendo e parti di alimentacion. Nan a palabra cu un bes pa siman un trahado ta bin y transferi e placa pa alimentacion.

A puntra con lo haci cu mayor cu no cumpli, mirando situacion cu a perde trabou y por causa pleitamento. El a menciona cu no por papia di tur situacion, sinembargo pa mayornan cu a perde trabou ta bira dificil pa evalua, ricibi pago.

Pa e placa cu a drenta den ultimo dianan, el a bisa cu a percura pa bay cu e placa awe mainta pa asina sigui cana normal pa bienestar di e muchanan. “Nos ta haci suplica na mayor cu ta contribui na e mucha menor di edad, pa haci esaki digital. Nos a manda comunicado pa saca e number di cuenta pa transferi e suma y menciona e nomber di yiu pa alimentacion.”

Berkmeyer a bisa cu sea cu e mayor ta den dificultad pa motibo di perde trabou y no ricibi pago, mester comunica cu e mayor cu tin e cuido di e mucha na cas. “Nos como ser humano ta rekeri pa comunica lo miho posibel.”

Pa cualkier pregunta locual ta trata alimentacion por manda un email na alimentatiedvr@gmail.com. El e menciona cu tin trahado disponibel cu ta colecta e pregunta y trece cerca nan miembro pa asina por duna un contesta.

Actualmente nan a minimalisa e trabou y ta pidi pa mayornan cumpli. “Na e momento dificil aki, ta dificil si tin caso cu ta bay mas leu, mirando cu corte tambe ta cera. Y nan no lo atende caso cu no ta urgencia.”

E ta pidi pa mayor keda comunica pa wak na kico of unda por yega na acuerdo pa e bienester di e muchanan. “Awo mester ta consciente pa wak e necesidad pa ora di saca placa, pa haci uso di manera importante y necesario pasobra tin henter un luna pa bay.”