Recientemente hunta di ‘Vacation Rental Professional of Aruba’ (VRPA), tabata di bishita cerca Minister di Asuntonan Economico, Comunicacion y Desaroyo Sostenibel, Geoffrey Wever pa combersa encuanto e proposito di VRPA, desaroyo y futuro di e industria di Vacation Rentals na Aruba.

VRPA ta un asociacion cu a wordo funda na aña 2021 cu e meta pa defende e beneficionan di e industria di Vacation Rental na Aruba y boga pa regulacion na un manera profesional y husto. Den luna di April 2022, VRPA a conduci un estudio di e impacto economico y laboral pa Aruba y e resultado a indica cu Aruba a alcansa un maximo historico durante 2021 di $470 miyon dolar total den actividad economico, generando alrededor di 5600 cupo di trabou y creando oportunidadnan empresarial pa companianan chikito di mantencion, hardineria y limpiesa. Esaki tabata un recuperacion mas acelera di Aruba su stabilidad economico directo y indirecto, compara cu turismo en general.

Durante e combersacion cu Minister Wever, Minister a trece pa dilanti e intencionnan di Gobierno pa traha hunto cu tur stakeholders pa yega na regulacion eficiente y beneficioso pa e industria y pais Aruba. Minister Wever ta altanto di e desaroyo y e potencial di e industria pa Aruba, pero a vocifera tambe algun aspecto di preocupacion, manera por ehempel aumento di prijsnan di benta di cas na Aruba como tambe doñonan stranhero di propiedadnan na Aruba. Na su turno hunta di VRPA a duna contexto na e situacion actual, unda cu aumento di prijsnan di benta di propiedad ta primeramente debi na costonan di material di construccion cu ya caba ta 30% – pa 40% mas halto compara cu Merca door di importacion. E aumento di prijs di vivienda ta debi principalmente na e aumento adicional di 35% di costonan di construccion den e ultimo aña pa motibo fuera di alcance di Aruba.

VRPA a aclarea cu e percepcion cu mayoria Vacation Rentals ta di doñonan stranhero, no ta cuadra cu realidad. Berdad ta, cu den zona di Noord, varios propiedad ta di doñonan stranhero cu a scoge pa inverti den Aruba, aportando na embeyicemento di producto Aruba como tambe hisando e balor di propiedad den areanan residencial cu ta cerca di zonanan turistico. Pero mester tene na consideracion cu tin hopi propiedadnan cu ta di localnan tambe den otro zonanan residencial.

Tendencia den e sector aki ta indica cu mas y mas localnan ta scoge pa inverti nan propiedad den Vacation Rentals, asina creando otro tipo di entrada pa nan mes. Esaki ta rekeri un estudio mas extenso pa tin e datonan specifico aki. VRPA a indica cu for di datonan di e companianan profesional di maneho di propiedad di Vacation Rental, 50% di propiedadnan di Vacation Rentals ta di doñonan local. E tendencia aki di inversion di nos localnan den propiedad pa uzo di estadia recreacional, lo bay sigui aumenta.

Impuesto

Un topico cu actualmente ta hopi den discusion, ta e contribucion di impuesto di e industria di Vacation Rental. VRPA ta comparti e preocupacion pa cu esaki y ta boga pa regulacion husto di impuesto. Actualmente, companianan di maneho profesional di propiedad di Vacation Rental, ta cumpli cu pagonan di impuesto debidamente. Pa locual ta e Vacation Rentals cu ta wordo maneha individualmente, no tin datonan di esaki.

VRPA a conseha Minister Wever diferente manera cu den corto plaso por yuda soluciona esaki manera por ehempel cera un acuerdo cu companianan manera Airbnb y VRBO pa factura e impuesto den nan prijs pa despues paga Aruba bek. Esaki ta duna Aruba mas tempo pa traha na un solucion duradero unda Aruba mes por administra y maneha e cobramento di impuesto. Realidad ta cu e lo rekeri tempo y inversion pa Departamento di Impuesto por conduci un inventarisacion di tur propiedad di Vacation Rentals na Aruba, como tambe introduccion di un infrastructura di control y maneho.

VRPA ta satisfecho cu e reunion y contento cu e vision di Minister di Asuntonan di Economia, Comunicacion y Desaroyo Sostenibel y tambe pa su disponibilidad pa hunto yega na solucionnan duradero y factibel pa como tanto e industria di Vacation Rental y pais Aruba. A palabra, cu VRPA ta disponibel na traha hunto y duna conseho encuanto regulacion di e industria.

Minister Wever tambe a demostra su disponibilidad pa mas dialogo y inclusion di VRPA y su expertonan den decisionnan pa cu aspectonan cu ta concerni e industria di Vacation Rentals, finalisando cu e opinion cu e industria di Vacation Rentals ta necesario pa Aruba y t’ey pa keda.

LEAVE A REPLY

Please enter your comment!
Please enter your name here