E Federal Cartel Office tin preocupacion tocante comparti data cu app di terceros. Un watchdog anti- confiansa Aleman lo duna ordo na Facebook pa stop di colecta cierto data di usuarionan, segun un reporte.

E Federal Cartel Office, conoci localmente como e Bundeskartellamt, principalmente ta preocupa tocante comparti data cu app y websita pafo di Facebook – incluyendo Twitter y e companianan propiedad di Facebook manera WhatsApp y Instagram, segun e corant Aleman Bild am Sonntag a reporta diadomingo.

E grupo ta investigando Facebook pa añanan caba, y ya caba a haya cu e compania a abusa di su dominio di e mercado pa colecta data di usuarionan sin nan permiso ni conocemento, segun Reuters. Nan lo presenta un decision na e red social tocante e accion cu e mester realisa den e proximo simannan, pero Bild a reporta cu e Bundeskartellamt mas probablemente lo pone un deadline pa cumpli, na luga di exigi cumplimento inmediato. Si Facebook no cumpli, e lo por ricibi un boet di 10 miyon euro.

“Desde 2016, nos tin contacto regular cu e Bundeskartellamt, y a responde na nan peticionnan”, un vocero di facebook a bisa den un declaracion via email. “Manera nos a bisa publicamente na 2017, nos no ta di acuerdo cu nan punto di bista y e conflacion di leynan di proteccion di data y leynan anti confiansa, y lo continua defende nos posicion.”

E Bundeskartellamt a bisa cu e no por comenta riba e procedimentonan andando actualmente.
Facebook a enfrenta escrutinio Aleman previamente tocante ‘discurso di odio’ y ‘fake news’, y un otro grupo di vigilancia a demanda su app di mensahe, WhatsApp, tocante siguridad.

Na Merca, e tin un demanda di fiscal general di DC tocante acusacionnan cu el a faya di salvaguardia usuarionan ora cu a permiti e compania di consulta politico Britanico, Cambridge Analytica, acceso na nan data personal.