images.jpg

ORANJESTAD – Director di WEB, Luis Oduber a splica cu tin pa admiti berdad cu algun luna atras, den un reunion, a bisa cu cierto vacaturanan, pa specifica, den e departamento di distribucion di awa, lo wordo yena. Pero esey ta prome cu a haya e smartmeternan, entre tanto e meternan t’ey y nan ta instala. E proceso di proyecto piloto ta andando. Una bes cu esey keda cla, ta calcula pa fin di e aña aki, lo evalua si e meternan ta funciona manera spera.

E por ta cu kisas e meternan no ta funciona, pero kisas nan ta funciona tambe. Awor aki ta tuma un decision cu no ta tuma ningun hende den servicio permanente. Contratistanan si ta keda yuda y na momento cu e proyecto piloto keda cla, lo sinta y tuma decision atrobe. E por wordo cambia awo of den futuro.

Oduber a splica cu e meternan aki ta bay rekeri mantencion. Alabes a bisa cu ta bay duna diferente servicio y esey ta loke a desafio e grupo, pa nan bin cu idea pa ki servicio adicional lo haci. Lo bay brinda miho servicio na cliente y den cuadro di esey mester ta mas creativo. Awo WEB su responsabilidad ta yega te na meter di awa. Loke ta despues di meter di awa, esta cura di cas of cura di empresa, WEB no ta responsabel pe.

Pero kisas cu e conocemento y experticio, nan por bay duna servicio. Ta haciendo awor aki mas riba base di emergencia. Tin biaha un cliente su tubo a kibra y ta yuda nan un rato, pero en principio no ta cobra pe. Tin gasto y ta pagando pa empleadonan orario y si den futuro lo brinda mas servicio, haci investigacion y yuda cu lekmento, lo haci esey, pero lo pone den nan maneho cu nan tin.

Oduber a splica cu sa di e carga cu e empleado di WEB tin. Ta busca mas hende contratista si mester. Pero si den futuro e subimento y bahamento di auto ta bay minimalisa of ta bay wordo practicamente elimina. Si WEB ta bay duna mas servicio. Ta bay controla e meternan, check e testnan, calibra nan, reeduca nan pa haci otro tipo di trabao cu actualmente tuma meter of deal cu e clientenan.

Tras di henter e situacion aki no tin mala fe. E coleganan sa di e director cu e ta hopi transparente y ta bisa cosnan manera cu e ta. Tur ta den cuadro di mehoracion di servicio na e cliente den e departamento aki y tambe tur hende mester traha hunto den un WEB y no departamentonan individual.

Berdad ta cu tin empleadonan di e departamento a solicita pa bay den otro departamento, pero cada un cos cu a sali, a wordo reemplasa cu un contratista. Den cuadro cu futuro di WEB ta mira e gastonan cu tin y si bay den sistema automatisa, ta tumando meter pa Elmar tambe. Elmar tambe ta ocupa cu un proyecto di meter prepago y smartmeter. Den futuro e tecnologia ta cambiando y tin cu bay hunto cun’e. Si no bay cambia, ta bay tuma un departamento cu hopi hende y no tin trabao pa nan. Unico garantia cu por duna e empleadonan di WEB ta cu nan ta wanta nan trabao, pero no kier yena cupo cu kisas den futuro no lo bay tin mester. Esey a wordo splica na nan den varios ocasion.

Loke a haci ta habri solicitud interno. Ta purba interno wak si tin hende interesa den un cambio nobo. Esey a tuma luga y un persona a solicita y a bay den e departamento. Prome cu bay pafo, ta aumenta e cantidad di empleado di WEB. Ta wak WEB completo, no e departamento so. Pa e motibo ey, porta berdad nan a crea e expectativa lo wordo yena, pero nunca a bisa cu lo wordo yena directamente, e director a splica.

LEAVE A REPLY

Please enter your comment!
Please enter your name here