Greg Peterson di Aruba Birdlife Conservation ta laga sa den un relato cu nos a haya, con importante e Wetlands (saliñanan) ta pa nos parhanan aki na Aruba.

Nos economia a base di fosfaat a bin pa via di e ‘waste’ di e parhanan. Nos ta un pais cu tin cantidad di nomber di parhanan tur caminda den nos sistema geografico, manera Parkietenbos, Sero Theishi y Sero Patrishi. E Wetlands den e henter e proceso aki tin e rol primordial pa bida di parhanan di Aruba mes, pero tambe pa esunnan migratorio cu ta bin nos pais, e relato ta bisa.

Sr. Peterson ta splica cu Aruba tin tres sistema di migracion di parha esta, Noord-Zuid di e continente Mericano, unda cu ora cu tin winter na Noord e parhanan ta bin Zuid. E parhanan di lama, ‘Booby’ ta bin Aruba, pa cual Aruba ta e unico pais unda cu tin 10 diferente tipo di Booby cu ta pone webo y haya baby riba un isla hopi chikito.

Tambe tin e migracion paralel entre Aruba, Colombia y Venezuela. E sistema cu awasero ta cay na nos pais ta conecta cu henter e sistema di migracion di parhanan. Ora cu e parhanan cuminsa sali for di Noord-America bin abou, ta net temporada di augustus/september ora cu awasero ta cuminsa cay na Aruba. Na momento cu nan ta bayendo bek Noord na april/mei, e secura a cuminsa drenta bek na Aruba. Pues di e forma aki por ilustra cu henter nos sistema di awasero ta conecta internacionalmente.

Wetlands ta interconecta, pues si causa daño na un di nan, esaki ta causa daño na un otro y consecuentemente na otro sistemanan tambe manera; nos piscadonan cu ta depende di nos mangelnan y e rifnan pa por haya pisca. Ta causa daño tambe na nos turismo, pa loke ta e actividad di buceo y turistanan cu ta bin nos isla pa landa etc. como cu e coralnan lo muri.

Concluyendo, sr. Peterson a bisa: “Si kier yuda nos economia, mester percura cu nos wetlands ta bon proteha. Pa e motibo aki tambe a bin cu proposicion pa proteccion di 16 area na Aruba. 21 miembro di parlamento a bay di acuerdo pa proteha e areanan aki.”

Despues a bin cu un accion di firma, unda 12 mil hende a firma cual ta significa hopi. Ta contento cu ta mira den medionan di comunicacion cu mas articulonan ta sali di Ministerio encarga cu Medio Ambiente y departamento di Naturalesa y Medio Ambiente pa conscientisa comunidad di nos Wetlands. “Pasobra mas area wordo proteha, esaki lo mehora e calidad di e areanan aki pa e proximo generacionnan y bienestar di nos pais”, sr. Peterson a clausura.