E body scanner na aeropuerto Hato no ta daña, manera alcalde di Rotterdam, Ahmed Aboutaleb a bisa siman pasa. Pero tampoco e ta wordo uza actualmente.Esaki segun un vocero di Aduana pa e Post Hato, Etienne Cacciano. Pakico no ta uzando e scanner, e no por a duna comentario.

Aboutaleb tabata na Corsou siman pasa y a bisa e medio NOS cu ‘mayoria di scanner di droga tanto den aeropuerto como haf di Corsou ta daña pa añanan’. Investigacion ta mustra cu tin un scanner na Hato, cual no ta den uzo. E dos scanner di container na haf ta kibra pa un aña caba. Esey no ta nifica cu no tin chekeo, segun Cacciano.

“Team di Hato ta activo na aeropuerto” Cacciano a bisa. E team aki ta screen pasaheronan riba vuelonan Europeo for di momento cu nan ta check in te cu nan aborda nan avion. Cacciano no por bisa con ta haci esey, pero ta enfatisa cu e team ‘ta train pa reconoce esunnan traficando droga’. E screening basicamente ta principalmente basa riba caracteristicanan externo.

Dos siman pasa a gara un traficante. “Inmediatamente nos a nota un hende asina, nos ta haci nos trabou. Unicamente si nos ta mucho laat y e persona ya ta den e avion, nos ta informa aduana na Schiphol.”

E maneho pa cu traficante di droga a ser reforsa despues cu Alemania a bati alarma ora Airberlin a cuminsa opera pa y for di Corsou. E team Hato awo ta consisti unicamente di aduana. “Nos ta trahando riba expansion di e team cu miembronan di forsa policial y Marechausee, manera tabata antes.”

Scanner di container.
 Luthsel Lourens, cabesante di aduana na haf, a bisa cu ta berdad cu dos scanner di container na haf ta kibra pa un aña. Esaki ta nifica cu chekeo di e containernan ta haci ‘fisicamente’. Pero unicamente cu containernan importa. “Containernan cu ta sali ta check unicamente si tin un tip for di autoridad cu nan por tin droga. Nos ta responsabel pa siguridad y salud di nos sociedad, y p’esey nos ta check tur container cu ta yega. E destinacion final ta responsabel pa esaki. Container cu ta bay Rotterdam, pues mester check ayanan.”

Aduana di Corsou (bou minister di Fianzas, Gijsbertha) no ta kere cu ta responsabel pa locual ta hinca den e containernan na haf di Corsou mes. Segun Lourens, un di e scannernan lo keda repara pronto. “Esey ta spaar personal. Pero nos mester un plan B.” Den e 29 aña cu e ta traha na aduana, Lourens regularmente a haya droga den container. Segun e, esey ta nifica no mas cu un kilo of algun gram. “Ningun droga ta produci na Corsou. Si bo compara cu Hulanda, relativamente tiki ta drenta via haf.”

Cuanto traficante di droga a keda aresta e aña aki, Ministerio di Husticia ni Ministerio Publico por bisa ainda.

E scanner di container y e scanner na aeropuerto ta responsabilidad di aduana, cual ta bou ministerio di Finanzas. E minister di Husticia, Quincy Girigorie, ta unicamente responsabel pa e body scanner. E no kier duna un declaracion tocante esaki, pasobra e ta relaciona cu ‘informacion operacional tocante siguridad y investigacion di ofensanan criminal’.

“E deteccion y prevencion di transporte di droga via Corsou pa Hulanda tin e atencion enfatico di Husticia y mester ser ataca conhuntamente den Reino. Corsou ta tuma su responsabilidad den esaki na serio”, Girigorie a bisa den un declaracion cortico.