Xiomara Maduro, Minister di Finanzas, Asuntonan Economico y Cultura: ‘No ta tempo pa discuti mas, aki un par di dia no tin placa pa nos por cumpli’

Minister di Finanzas, Asuntonan Economico y Cultura, Xiomara Maduro a informa comunidad durante un conferencia di prensa cu e situacion na Aruba ta serio y cu si algo no pasa te aki tres luna cu lo por cambia e situacion, nan no lo haya e placa pa paga salarionan.

“E situacion na Aruba ta hopi precario”, Maduro a señala, como tambe a bisa cu den e proceso aki Gobierno ta trahando pa pais Aruba no kibra, pa motibo cu e urgencia ta grandi y pais aki ta bay kibra si no haya e yudansa cu Hulanda so por duna.

Pa e motibo aki, el a manifesta cu Gobierno ta bin trahando pa por haya e condicionnan pa pone riba mesa di ki manera nan ta bay corta gasto. E momentonan aki no ta pa discuti ken por tin pa duna mas. “No ta tempo pa discuti mas, pasobra aki un par di dia no tin e placa pa nos por cumpli”, Maduro a enfatisa.

Di esaki, el a bisa cu no ta trata solamente di servicio publico si no cu tambe ta trata di e pais. Tambe a comenta cu si no tuma un decision hunto na beneficio di e pais aki, esey lo kibra riba tur hende.

Na mesun tempo, Maduro a haya e pregunta tocante e placa cu ta falta pa pone disponibel pa desempleo, negoshinan y cubri deficit di SVB cu AZV; ya cu Hulanda a proba 582 miyon florin di e 683 cu mester. Di esaki el a trece dilanti cu nan a traha un presupuesto pa pais Aruba, den cual a splica kico ta bay nifica ora cu 80% di entrada di comunidad ta cay afo, esey ta produci un deficit di 1.3 biyon.

Di e parti aki, normalmente Gobierno di Aruba ta subi riba mercado internacional pa pidi e placa pa gobernacion di pais Aruba. Na momento cu COVID-19 a bati na port,a nan a haci e peticion na Hulanda pa nan por haya e parti di e placa cu nan tin mester – cu ta 1.3 biyon – pa por brinda e subsidio di salario.

Asina mes, el a bisa cu siguridad cu e parti pa paga desempleo, negoshinan y cubri deficit di SVB cu AZV nan no tin’e y p’esey ta asina importante pa nan por cumpli cu e condicionnan di Hulanda pa asina por ricibi e placa. “Si nos no ricibi e placa aki, esey ta nifica cu nos no por lora e pais”, el a manifesta.

El a referi pa sindicatonan cu si gobierno no logra, esey ta nifica cu nan ta bay paga a base di locual tin den caha, e likides na e momento ey. Y si e likides ey no ta suficiente, nan no por paga tur ambtenaar of mas specifico no por paga mes, pa motibo cu tambe mester tin placa pa AZV e salubridad y na banda di dje SVB pa e hende grandi.