30juliNP studiantenan (1).jpg

Yakari Gabriel

Si bo no ta sigur di kico bo kier, miho keda Aruba y no bay gasta placa

 

E weekend aki prome grupo di studiantenan ta sali rumbo pa bay studia na Hulanda. Yakari Gabriel ya tin un aña como studiante na Hulanda unda cu el a haal su Propedeuse den International Communications and Media. E tin algun conseho y tip pa esunnan cu ta biahando basa ariba su experiencia.

“Ora bo yega Hulanda y bo mira algo cu bo kier of mester hopi barata, no core cumpre pasobra chens ta grandi cu tin un otro luga cu tin e mas barata ainda.” Asina Yakari a inicia e entrevista teni exclusivamente cu Bon Dia Aruba.

Budget

Ta hopi cauteloso riba locual cu bo ta gasta bo placa, esaki ta un conseho sigur pa e prome dianan na Hulanda, pero tambe pa e periodo cu bo ta bibando eynan. E ta hopi importante pa bo tin un bon budget y traha diferente budget. Por ehempel esaki ta locual cu bo ta bay gasta na cuminda, un otro parti ta pa actividad, otro pa spaar, y cuminda. “Pasobra si bo ta cauteloso cu bo placa e ta yega te hasta pa bo spaar. Cuminda na Hulanda ta super barata, pues placa pa cuminda lo ta e menos di bo procupacionnan ‘unless’ cu bo kier come afo tur dia.”

Probecha

Un otro conseho di Yakari ta pa “take advantage” di tur cos, explora bo area, cana den ciudad etc. Specialmente cu scol, tur carera ta diferente pero semper purba di ta “ahead of your game”. Si bo tin un tarea anto bo tin un fecha pa entrega, no warda te final pa haci esaki sin haci nada pasobra e lo mustra mas dificil. Si bo a calcula e tempo y haci algo cada siman, bo lo a wak cu e no tabata hopi trabou.

Lugar di biba

Na comienso Yakari a wordo confronta cu hopi reto pa loke ta caminda pa biba na Hulanda. “E cuenta di busca cas ta basta dificil ora cu bo no ta eynan, pues, ami lo sugeri, wak si bo por haya un caminda di “crash” mientrastanto cu bo ta busca un camber pasobra e ta hopi importante pa bay wak e camber. Hopi hende ta core paga cos via online etc. Y ora cu nan yega, e no ta locual cu nan a spera. Pues ta sigur cu e ta locual cu bo kier. Y hopi importante ta tambe e bario/area, puntra opinion rond pa bo no hayabo ta biba den un ambiente cu bo no kier.” El a sigui splica cu na comienso bo por bira un poco desespera, cual ta locual cu Yakari ta splica cu a pasa cun’e, pasobra bo djis kier un caminda di biba ora scol ta casi cuminsa, y bo no por keda paga transport etc. Otro cos cu mester corda ora cu ta huur un cas, ta cu e por tin “contract kosten” cu ta bin acerca y deposito inicialmente. Segun Yakari su experiencia na dado momento e tabatin mester di un luga pa biba y a haya contacto via un persona cu un makelaar, kende a cobre 500 euro pa contract kosten. “Pues of bo ta busca un makelaar prome cu bo cuminsa gasta tur bo placa, como cu mi tabatin un luna caba na Hulanda buscando pa haya camber. Otro opcionnan ta pa atende e “hospiteeravonden”, cual por ta frustrante, como cu tin hopi hende cu tin mester di camber. Y bo tincu keda bishita cas etc. Y si otro hendenan cu ta biba den un camber ta haya bo leuk e ora bo ta haya e camber. Tambe por inscribi riba e listanan pa studiante, pasobra mas largo bo ta riba e lista, mas prioridad bo tin ora un camber ta disponibel.

Un camber ta hopi importante, como cu bo mester un adres pa registra bo mes, pa bo por haya bo OV di studiante, cual ta e carchi pa bo transporte publico. Si no bo mes mester paga pa transporte publico cual ta mucho mas caro. Tur dia 3 euro bay y 3 euro bin, asina mes cu e tabata cerca di su scol. Y pa bay Den Haag etc, tabata 40 euro riba un dia na transporte publico, pues hopi mal gastamento di placa, el a splica.

Scol ta primordial

Pa ta cerca di bo scol ta primordial, pensa cu scol bo ta bay tur dia, y trip ta “af en toe”.  “Ami ta stima Amsterdam, pero mi scol ta na Utrecht pues mi a pensa cu e ta miho pa mi ta cerca di mi scol y ora  cu mi kier mi por bay Amsterdam of Den Haag. Pero mi scol mi mester echt bya tur dia. Si bo ta biba leu di bo scol pa un of otro motibo, corda cu e ta bay tuma hopi disciplina pa lanta coy trein y bus pa bo yega bo scol. Y tur e “traveling” aki ta locual cu ta echt cansa bo, pues mester tene esaki na cuenta semper.” Hasta si na comienso bo ta leu for di bo scol como cu bo no a haya nada den e ciudad di bo scol, keda busca, a pesar cu bo ta comodo unda cu bo ta y bo no ta worry cu e distancia. Pasobra sino e ta un presion extra riba bo estudio.

Trein tampoco ta confiabel tur ora

No ta tur ora trein ta confiabel, no ta tur ora tin trein disponibel pa bay un caminda, tin ora tin storing por ehempel. Imagina cu bo tin un examen anto bo ta pega den un otro stad, Yakari a bisa. Esaki ta algo bon cu el a remarca, como cu aki na Aruba hopi tin e percepcion cu trein etc na Hulanda e transporte ta semper na tempo y semper confiabel. Cual obviamente tin cosnnan cu por presenta cu bo no tin control riba dje. Un experiencia cu Yakari a pasa aden ta, un suicidio cu a tuma luga y trein a pasa riba e persona, cuala  haci cu nan a keda pega te 1or di marduga. Pa ora el a cuminsa core bek y e yega unda cu e mester a yega, no tabatin trein ta core mas y e mester a paga taxi cual ta mucho mas caro pa e por a yega su cas.

Conseho

“Hinca den bo cabes cu e cuminsamento semper ta duro y bo mester pusha pa bay dilanti, duna tur cos un chens, hinca bo meta den bo cabes cual ta bo estudio cual ta prioridad. Tambe corda pakico bo a tuma e decision pa bay afo. E hecho cu mi a keda hopi Aruba despues di a gradua for di Havo a sirbi como un push pa mi a bay Hulanda hopi motiva y sabiendo kico mi kier. E diferente trabounan tambe a mustra mi con e trato y salario ta ora cu bo no ta studia. Un bon posicion di trabou por tey awe, pero nan por kite fey bo, bo estudio no,” El a termina bisando.