Comerciante y bishitantenan a reporta cu e cantidad di adicto ambulante den Oranjestad su centro a disminui un poco.

Segun medio local, como resultado di esaki e centro a bira mas keto y accesibel pa tanto residente como turista, sinembargo no ta menciona un cifra cu ta confirma e disminucion aki.

Sin embargo, ta keda mantene cu e problema ta leu di ta resolvi. E yamado na gobierno di Aruba ta sigui pa un contesta structural – uno cu ta combina seguridad publico, cuido medico, shelter y tratamento di adiccion na luga di solamente atende cu loke ta visible.

Hende cu ta drumi riba caya ta keda un bista regular, y ta empeora pa e hecho cu comerciantenan ya caba a yega di trece dilanti keho cu e mesun personanan aki ta haci nan necesidad riba caya, ademas di acerca clientenan di tienda of restaurant, y te hasta bishitante.

Segun nan ta reporta, e comportamento aki a y ta sigui crea un sentido di desorden y inkietud entre bishitante y ciudadanonan, poniendo presion riba e centro di ciudad su imagen.

E comerciantenan kier mira cooperacion mas cercano entre agencianan di gobierno involucra.

E peticion central ta keda cu no mester simplemente saca e hende luchando cu adiccion for di e area, sino conecta nan cu un shelter apropia, sosten medico y servicionan di rehabilitacion.

Pa varios turista yegando via crucero of biniendo for di hotel, Oranjestad ta e introduccion na Aruba. Comerciantenan ta argumenta cu e realidad aki ta duna mas importancia ainda na mantene e area limpi, acogedor y safe pa ambos residente y bishitante.

E disminucion den desorden ta mira como un prome paso den e direccion corecto. Sin embargo e preocupacionnan clave ta persisti y ta trece pregunta importante.

Algun luna atras Bon Dia Aruba a reporta cu a activa un taskforce pa centro di ciudad como parti di revitalisacion di Oranjestad. E iniciativa aki tabata basa riba e establecimento oficial di un taskforce interministerial bao e titulo “Convivencia: Centronan di Ciudad Sigur y Humano”, crea pa medio di un ministeriële beschikking como parti di e implementacion di politica di gobierno pa 2025–2028.

E taskforce tabatin como obhetivo principal desaroya y ehecuta un strategia integral pa fortalece siguridad, convivencia, calidad turistico y habitabel den centro di Oranjestad y San Nicolas. Entre su responsabilidadnan tin coordinacion di accionnan social, preventivo y di siguridad, manera tambe desaroyo di un plan di accion pa periodo 2025–2027.

E tempo aya, Korpschef Ramon Arnhem a haci un apelacion directo na comunidad pa enfrenta hunto e reto di calidad di bida den centro di Oranjestad. Durante su declaracion, Arnhem a enfatisa cu e problema no ta uno individual, sino un reto comparti cu ta rekeri accion conhunto entre gobierno, institucionnan y comunidad. “Nos tin un problema conhuntamente, y mi ta pidi boso awe pa un yudansa pa trata e problema aki hunto,” Arnhem a expresa e tempo aya durante un conferencia di prensa.

Segun e Korpschef, e situacion den centro di e ciudad tabata – y ta sigui te ainda – caracterisa pa varios factor cu ta influi negativamente riba calidad di bida. Entre esaki, el a menciona falta di limpiesa, edificionan bandona den mal estado y presencia di persona vulnerabel sin un luga fiho pa keda, loke ta crea preocupacion tanto riba siguridad como riba e imagen di Oranjestad.

Entre e accionnan concreto cu lo implementa a describi: mas limpiesa y mantencion di caya, fortalecemento di vigilancia y presencia den centro, retiro di auto bandona y situacionnan peligroso y atencion y orientacion pa persona vulnerabel.

Aunke berdaderamente tin un mehoracion visible, te ainda mester mira resultadonan concreto di e solucion cu a compromete di trece pa Oranjestad. Claramente, esaki no ta nifica cu e taskforce no ta trahando of cu no tin resultado, mirando cu apenas a pasa algun luna y ya caba ta mirando un mehoracion den e situacion manera e comerciantenan a reporta; pero si e ta nifica cu te ainda no tin reportahe ni señal di un solucion realmente fuerte y profundo, cual ta haci cu e preocupacionnan ta keda presente y yamado pa solucion ta persisti. Como comunidad, ta nos deber mantene nos mes informa tocante desaroyo y solucionnan cu ta presenta na nos, pa asina nos autoridadnan por mira y sinti cu tin un pueblo cu ta presta atencion na nan declaracionnan y ta exigi resultado.

Preguntanan tocante ki accion a tuma caba, con hopi capacidad di shelter ta disponible, con hopi persona ta riba caya ainda, unda, si a caso, e personanan cu saca for di e centro ta ricibiendo tratamento, ta loke lo mantene un sorto di supervision riba tanto e taskforce como gobierno y lo sigura cu nos lo mira resultadonan concreto y e solucionnan structural na un problema cu a pesar di mehoracion, ta sigui presente.