(NLTimes) – E autoridad di awa na Hulanda ta keda sin mas medida pa combati e secura. Algun na e parti zuid y oost di e pais a yega caba na e fondo di nan “caha di herment”, y awor no a keda nan otro cu spera pa yobida, NU.nl a informa.

Durante e ultimo simannan, y na algun parti di e pais durante varios luna caba, e autoridad di awa a haci tur loke tabata den nan poder pa retene tanto awa cu ta posible. Den hopi region a prohibi muha mata cu awa for di sloot y riunan. Awa dushi ta ser warda den poldernan cu normalmente ta destina pa ricibi exceso di awa durante yobida fuerte, y candalnan ta keda na lock.

Autoridad di awa di Drents Overijsselse Delta a bisa e cu nan “a yega na nan limite”. E autoridad di awa di De Dommel na Noord-Brabant tampoco tin mas opcion. E “caha di herment” ta bashi den hopi region, un vocero di Unie van Waterschappen a bisa e corant.

Te na e momento aki, no tin yobida importante na bista. Contrario, den algun dia mas e deficit di precipitacion ta spera pa pasa esun di e zomer extremadamente seco di 2018.

Tampoco e riunan Rijn y Maas lo por suministra mas awa. Rijkswaterstaat ta spera cu e nivel di awa den riu Rijn lo subi un tiki, pero lo keda “extremadamente abao”. Segun e agencia di infrastructura, e nivel di awa den riu Maas lo keda “constantemente abao”.

Den zomernan seco anterior, mas tanto den e parti oost y zuidoost di e pais tabata ser afecta. E aña aki, sinembargo, e parti west di Hulanda tambe ta enfrenta un deficit considerable di precipitacion. E autoridad di awa di Delfland, cu ta cubri un area cerca di Den Haag, a prohibi muhamento di mata cu awa for di slootnan pa prome biaha den su historia.

E medida ta afecta gravemente Westland, e curason di e agricultura den greenhouses na Hulanda. Segun e organisacion Glastuinbouw Nederland, alrededor di 150 cultivador ta ser afecta pa e prohibicion, cu por causa daño cu por yega te €150 miyon.

E nivel abao di e riunan tambe ta causa salinisacion: awa salo ta penetra mas paden den tera, loke ta dañino pa naturalesa y e calidad di awa. E autoridadnan di awa ta mantene candal y sluisnan, portanan pa mantene nivel di awa, riu of canal, cera pa retene mas tanto awa dushi cu ta posible. Pero si e nivel di awa den e polder sigui baha pa motibo di e hopi evaporacion, nan lo mester laga awa salo drenta pa mantene e damnan firme.

E secura tambe ta haci e naturalesa Hulandes mas vulnerable pa candela den mondi, cu tampoco ta yuda pa conserva mas tanto awa cu ta posible. Dialuna y Diamars, dos helicopter Chinook di Ministerio di Defensa a basha casi 900.000 liter di awa riba un candela den mondi cerca di Venray, na Limburg. E awa ey a ser saca for di e riu Maas, cu tambe ta bira cada biaha mas bashi.