Despues di 25 aña Aruba ta logra clasifica den e top 10 di e certamen di Miss Universo. Srta. Thessaly Zimmerman, Miss Universo Aruba 2021 a realisa e gran logro aki pa Aruba y ayera tardi den e sala VIP di Aeropuerto Internacional Reina Beatrix, y den presencia di Minister di Finanzas y Cultura, Sra. Xiomara Maduro, Thessaly a wordo ricibi pa su famia y amistadnan.

“Hopi danki na tur hende cu t’ey awe presente, danki na Minister Xiomara tambe. Mi kier a bisa cu e sentimento ta increibel pa ta ‘kinan despues cu mi a sali den e top 10, no solamente di e muhenan mas bunita, pero e muhenan cu ta mas inteligente, empodera, disciplina, pasobra ta tuma tur eseynan pa por a logra sali den e top 10, no ta solamente bunitesa”, tabata e prome palabra di Thessaly durante e conferencia di prensa despues di su yegada na Aruba.

Thessaly a conta cu e trabao tabata hopi duro, pero e tabata un trabao cu el a haci cu hopi orguyo. Pasobra riba e scenario grandi ey e no tabata para como Thessaly Zimmerman, pero e tabata para como Aruba. Y door di esey, el a conta cu el a haci tur cos manera cu mester y el a destaca no solamente su cara, pero tambe e nomber di Aruba. “Mi haciele cu orguyo y mi ta hopi contento cu e resultadonan tambe.”

E cara di Thessaly na momento cu nan a yama Aruba den e top 16 ta inolvidabel, manera e mes a bisa: “Claramente mi a keda den shock ora cu nan yama mi nomber den top 16, manera boso tur a wak.” El a conta cu e tabata den shock pasobra Aruba ta un pais chikito y e sa cu hopi candidata prome cune tambe a traha hopi duro y a purba di resalta y haci tur cos posibel pa yega asina leu y nan no a logra.

“Mi tabata den shock, y hopi contento tambe y gradicido na e huradonan y e organisacion Miss Universo, cu a wak e potencial den mi y mi trabao duro y kico tur mi por logra. Mi ta hopi orguyoso di ta akinan awo y pa forma parti di e top 10 di e di 70 aniversario di Miss Universo. Mi no por ta mas contento cu mi ta aworaki y danki tambe na tur persona cu a yuda mi”, el a agrega.

Miembronan di prensa tabatin e oportunidad pa haci algun pregunta y un di e preguntanan cu Thessaly a ricibi tabata kico ta e cos mas valioso el a siña di su experiencia durante e certamen. Thessaly a contesta cu e cos mas valioso cu el a siña ta pa nunca perde fe y nunca perde speransa. “E ta normal cu bo ta perde bo fe y bo ta pensa bo no ta bay logra. Pero mi a keda bisa mi mes cu mi ta bay sali den e top 16 y mi a keda practica y haci lo mas posibel. Y mi a logra y esey tabata pasobra mi no a rindi y mi a keda cu mi fe y el a pasa.”

Thessaly tambe a ricibi e pregunta kico tabata e reaccion di e otro candidatanan na momento cu Aruba, un pais asina chikito, a wordo yama den top 16 y despues top 10. Thessaly a contesta cu di locual e por a tende e demas candidatanan tabata hopi entusiasma, sobretodo na momento cu nan a yamele den e top 10. “Mi a tende cu tur hende backstage a cuminsa grita di alegria, pasobra durante e competencia mi no a wak e manera cu mi tin cu rebaha un otro pa ami resalta, mi tabata yuda e otro candidatanan cu mester den cualkier manera cu mi por. Y esey a touch nan tur tambe cu nan tabata apoya mi ora mi a sali den e top 10 tambe.”

E parti di entrevista ta un di e partinan mas importante di e certamen. Thessaly a splica tambe cu tabatin dos parti di entrevista prome cu el a biaha pa e competencia di Miss Universo mes. E prome entrevista tabata un entrevista cu mester a dura 45 minuut, pero e entrevista di Thessaly a dura un ora y 15 minuut, mas largo cu normal. Tambe e mester a yena un curriculum, y el a conta cu esun di dje tabata un di esunnan mas largo. “Dus mi tabata hopi di conta y nan a bisa mi cu tur e informacion tabata hopi interesante y valioso tambe, cu e tabatin contenido y esey tambe a pone mi resalta.”

Na momento di e entrevista mes na e certamen, Thessaly a splica cu e tabatin tres minuut so pa demostra ken Thessaly ta y kico tur e lo por of kier logra. El a conta cu claramente e tabata nervioso y e tabata un tiki preocupa den e sentido cu e no por a conta tur cos cu e mester, pero toch e huradonan a wak algo den Thessaly cu a yudele yega den e top 10.

Minister di Finanzas y Cultura, Sra. Xiomara Maduro expresa su alegria y gratitud pa e gran esfuerso y trabao cu Thessaly a realisa cu a pone Thessaly y Aruba su nomber den e top 10. “Esaki sigur ta un honor pa nos pais, pa por a briya y awe sigur pa nos e ta un honor, un orguyo y e ta un placer y mas cu claro e palabra di gratitud pa e trabao cu bo a haci. Pasobra ta un representante di Aruba, sigur ariba e tarima asina importante, ta un responsabilidad grandi cu tin biaha nos no ta para keto na dje. Pasobra no ta solamente e certamen, pero e ta e caminda pa bo por yega na e certamen, e preparacion. Pero tur cos ta e disciplina cu Thessaly mes ta desplega y tambe e sosten cu e ta haya di su famia y amistadnan”, Maduro a bisa.

“Aruba tambe ta stima bo pasobra bo a representa nos dignamente. Ta orguyoso cu e trabao grandi cu bo a desplega a duna un fruta asina bunita y nos tin sigur cu aworaki tambe hopi porta a traves di bo ta habri no solamente pa bo como persona, pero tambe pa Aruba den mundo”, el a agrega.