Yiu muhe di Floyd Mayweather, Iyanna, a ser aresta pa delito di atake agrava cu un arma mortal, segun TMZ, y ta parce di ta un confrontacion relaciona cu NBA Youngboy.
Iyanna Mayweather actualmente ta den prison di condado Harris na Houston, despues cu el a ser aresta pa 1.30am diasabra ultimo. Fuentenan conecta cu agentenan di cumplimento di ley a bisa cu e supuesto victima y NBA Youngboy tabata na cas di Youngboy na momento cu Iyanna a yega y bisa e muhe, Lapattra Lashai Jacobs, cu ta e ta prometida di Youngboy y cu Jacobs mester bandona e cas. Jacobs a bisa Iyanna pa bay.
Ta bisa cu e argumento a move den cushina, unda Iyanna a gara dos cuchiu. Segun e fuentenan, Jacobs a dal un stap den direccion di Iyanna, y Iyanna a atak’e cu un di e cuchiunan. Jacobs a bisa polis cu e no a sinti e prome hinca, pero despues el a bisa cu Iyanna a atak’e cu e di dos cuchiu, hincando e un biaha mas.
Na momento cu personal di ambulance a yega, Jacobs tabata benta riba vloer. A hib’e hospital. Su condicion no ta conoci.
Youngboy, kende tabata na cas na e momento di e suceso, a ser poni momentariamente den boei – probablemente un medida di precaucion – prome cu a keda libera.
Iyanna a bisa polis cu Jacobs a incit’e door di inicualmente ranca su cabey pafo di e cas y despues core bay den cushina, unda e confrontacion a tuma luga.
Iyanna a bisa polis cu no tabata conoce Jacobs prome.
