Yiu homber di e terorista cu tabata tras di e atakenan di 11 September 2001 na Merca, Osama Bin Laden, kier vengansa pa e morto di su tata y ta declara guera contra Merca. E declaracionnan aki a bini for di un ex agente di FBI, kende ta examinando cartanan cu a wordo haya na e edificio unda Bin Laden a wordo mata door di autoridadnan Mericano den 2011. E yiu homber Hamza bin Laden, kende aworaki tin 28 aña, a compromete su mes pa sigui e pasonan di su tata. Den 2015 un mensahe di audio a wordo publica unda por scucha Hamza ta haci yamada pa atakenan terorista na London, Washington y Paris. Den e ultimo dos aña, el a publica cuater mensahe caminda ta yama pa atakenan contra e paisnan aki.
Segun autoridadnan, e grupo terorista al Qaeda tabata formulando plan pa e hoben Hamza tuma over e organisacion terorista desde cu e tabata chikito, ora cu e tabata aparece den videonan di propaganda.
Fuente: The Sun
