Den un entrevista cu un medio local a realisa cu Rino Hermans, Director di Departamento di Calamidad, el a splica cu ta buscando un pomp nobo pa asina sigura cu Aruba no haya calamidad ora di yobida di mas di 80mm.

Segun un relato di e matutino Diario, Hermans a conta cu Departamento di Calamidad tin un software pa monitor awasero, cual tin como base pa Aruba 80mm di awa den dos ora. E entrevista tabata relaciona cu e situacion riba Watty Vos Boulevard cu e yobidanan recien.

Segun e relato, Hermans a indica cu e sistema di monitor no a indica cu awa di yobida te awo lo causa molester pa trafico, cu cierto caminda na Watty Vos Boulevard, unda den pasado awa a pasa pa lama, e no a mira cu ‘nan a nivela un tiki ariba’.

Mientras cu nan por pronostica e resultado di un yobida di 80mm den dos ora, si mas awa cay cu un awasero mas fuerte, lo keda na e computer pa duna un indicacion. Segun e relato, Hermans a continua bisa cu resultado di inversion di gobierno desde 2004 ta velocidad, ya cu locual a tuma un dia pa maneha den pasado, pa mobilisa trafico ora di yobida, awo ta tuma un pa tres ora, na momento di awasero fuerte.

Si dura mas di tres ora, nan ta conta cu un sistema pa trafico por sigui mobilisa.

Sinembargo, lama ta hunga un rol importante. Si lama ta mucho halto, awa tin dificultad pa core for di caminda. Pa e motibo aki, Departamento di Calamidad a duna recomendacion, informando cua parti na Aruba ta debil y cua ta fuerte. Den e parti debil a señala cu Aruba no ta conta cu un pomp grandi, manera esun cu Coastal tabata pone na disposicion na aña 2004, cual no ta conta cune mas.

Departamento di Calamidad, hunto cu Servicio di Bombero ta buscando un pomp similar pa asina por maneha e situacion lo miho posibel den caso di awasero fuerte. Esaki no ta conta unicamente pa temporada di horcan, sino cualkier momento cu tin yobida di mas di 80mm, cual na Aruba por causa problema pa 2-3 ora, segun e relato ta finalisa.

 

LEAVE A REPLY

Please enter your comment!
Please enter your name here