Yobida fuerte (NW) (1).jpg
– Ayera marduga Aruba a wordo sorprendi pa yobida fuerte. Esaki a bay te cu den oranan di merdia. Diferente parti di Aruba a wordo inunda, y hendenan tabata pidi ayudo pa motibo cu nan cas a yena cu awa.
 
 
Areanan di Madiki y Noord a wordo afecta grandemente, unda cu hopi hende tabata yama y pidi asistencia pa motibo di e cantidad di awa cu tabata tin. Pero tambe areanan cu no ta conoci como areanan cu ta wordo afecta pa yobidanan fuerte, tabata pidi yudansa. Polis, Brandweer y otro departamentonan concerni a haya cantidad grandi di yamadanan di auxilio. Hopi hende tabata pidi asistencia pa motibo cu awa a drenta nan cas. A raporta cantidad di caso basta severo na unda famianan a sufri hopi daño material y cu te hasta mester a busca luga di drumi na shelter. 
 
Incidentenan rond Aruba
Hopi incidente a pasa rond di Aruba durante e yobida inespera aki. Den diferente districto coriente a bay pa basta largo. Diferente rooinan y damnan a bay over. Na Coba Lodo lamper a dal den awa cu tabata cerca di un persona, kende un rato a bay for di tino y despues a bin bek. E persona aki segun informenan no ta den un estado critico. Polisnan na San Barbola mester a rescata un famia cu a keda pega den nan auto. Na aeropuerto awa a drenta den edificio di U.S. Customs, na unda cu turistanan y trahadonan mester a cana den esaki. Na Rooi Manonchi un auto di polis a wordo lastra pa e awa na momento cu nan a keda pega ora cu nan tabata na caminda pa duna asistencia. Na e asina yama Paradera Corridor na unda ta a construi entre otro un pompstation nobo tambe tabatin daño. Algun aña Bon Dia Aruba a publica cu segun algun habitante e edificionan aki lo tapa unda rooi ta pasa y cu e pida caminda ey lo kibra pa via di esey. Ayera no solamente por a mira con e awa a traha su caminda pe bay dam di Rooi Afo, cobando entre otro bou klinkernan y halando nan for di nan luga. 
 
Careteranan bou awa
Hopi hende tabata pone riba Facebook unda por a mira camindanan inunda y cu autonan no por a pasa of te hasta a keda bou awa. Na Noord Valero Pumpstation un biaha mas tabata bou di awa. Tambe den area di hotel no por a yega na esaki facil, debi cu e camindanan tabata inunda, por ehempel na e crusada di Palm Beach Plaza. Diferente caminda a wordo cera pa motibo cu no por a pasa. Polis y ambulance a duna asistencia na un señora cu a cuminsa haya dolornan di parto. Den Playa por a mira camindanan inunda, unda cu e awa tabata hopi halto. Banda di Aruba Trading un biaha mas por a mira cu e awa tabata sumamente halto, y un biaha mas auto a keda pega eynan. 
 
Convergencia intertropical
Durante un conferencia di prensa cu prome minister Mike Eman, hunto cu Bureau Rampenbestrijding, Servicio Meteorologico y Brandweer, David Barkemeyer, director Interino di Departamento di Meteorologico a indica cu despues di 4’or di marduga algun awasero aisla a cuminsa cay. Pero pa mas den oranan di dia el a ripara cu e yobida a bira mas pio. Pe esaki tabata señal di un zona di convergencia intertropical. “E tipo di sistema aki ta un cos cu ta masha fastioso pa pronostica. Ta un cantidad di circunstancia tabata tin. E sistema aki tabata menasa caba pa un par di dia,” el a indica. Tambe e ta sigui bisa cu Servicio Meteorologico tabata mira den nan sistema di tempo cu lo por haya yobida, pero e cantidad cu a cay tabata hopi. A midi casi 70 mm di awa. E parti pio a pasa pa 10’or di mainta. “Si pone den comparacion cu Matthew cu tabata core rond di 40 mm, nos ta papiando di un cantidad hopi grandi di awa,” asina prome minister Eman a indica.
 
 
 

LEAVE A REPLY

Please enter your comment!
Please enter your name here