ORANJESTAD - Comunicacion tabata e problema y como tal, Minister di Husticia, sr. Arthur Dowers  a reuni diaranson atardi cu personal di Cuerpo di Bombero, pa mira kico exactamente ta e causa di tanto disgusto. E reunion tabata habri y e personal a haya oportunidad pa splica nan diferente problemanan cu mas bien ta sinta den e forma con e organisacion gubernamental ta hinca den otro. Pa David Roza di SIMBA no tabata un problema pa sacudi man di Minister Arthur Dowers despues di e encuentro na Cuerpo di Bombero, ayera tardi. Pero, aunke cu e Presidente di SIMBA mes ta satisfecho cu e splicacion di e Minister, e accion di morocoy ta sigui. Y e motibo ta simpel. Ta e miembronan mester dicidi si ta para esaki si of no. 

ORANJESTAD – Ayera den oranan di atardi pa anochi, dos funcionario di Fundacion Lotto pa Deporte a wordo atraca saliendo for di nan sede principal na Dakota. Segun informacion no-oficial, e dos atracadornan aki tabata den e parti paden di Entertainment Center cu ta conecta cu e oficina di e fundacion. Ora cu e director interino a sali cu un otro empleado pa bay deposita e placa, nan a wordo confronta cu dos homber, bisti na preto, cu cara tapa y arma. Nan a kita tur cos for di nan, e saconan di placa y nan celular, pa despues huy den un auto di huur. E investigacion den e caso ta sigui. Remarcabel si tabata e falta di siguridad total den transporte di un suma asina grandi di placa.

 ORANJESTAD – Na universidad di Aruba tin proceso andando pa reemplasa e actual rector Lydia Emerencia y esaki ta canando su caminda. Segun Minister di enseñansa tin un college di curatoren unda cu ora cu nan kier haci cualkier nombracion, mester presenta esaki na e minister y esey no a tuma luga ainda segun e mandatario a splica e siman aki. Na e momento aki no a ni presente cu e college ta bay presenta un rector nobo te pa nan bisa ken e candidatonan ta pa e funcion aki. Como tal e mandatario lo warda pero tambe invita nan tambe pa tende kico e maneho di e universidad ta. Manera cu ta conoci, universidad tabata un topico cayente durante tratamento di presupuesto recien, mescos cu tabata e caso di IPA. Aki e mandatario a ricibi hopi pregunta y critica  riba e funcionamento di e dos institutonan aki. Como tal lo bay invita e college di curatoren y e besturen responsabel di e institutonan respectivo den e dianan cu ta bin.

ORANJESTAD- Ayera den oranan di atardi capitan di e seleccion Hulandes na Sur Africa a yega Aruba pa disfruta di un vakantie bon mereci. Manera tur hende ta bon na altura e equipo Hulandes a titula sub campion mundial. Un logro grandi. Prome cu nan a bai Sur Africa caba Giovanni van Bronckhorst a anuncia cu e lo stop despues di e mundial aki. Den un wega amistoso diadomingo cu a pasa den “de Kuip”, e stadion di su equipo Feyenoord na unda el a cuminsa su carera na edad di solamente 7 aña, van Bronckhorst a hunga su ultimo wega contra e equipo Real Mallorca. Pa Giovanni van Bronckhorst, kende tin awor 35 aña, y cu durante su carera impresionante a hunga den e seleccion nacional Hulandes 106 biaha, e despedida tabata hopi emocional. Na Sur Africa e tabata capitan di e team Hulandes y a haci un bon trabou.

ORANJESTAD – Contrario na e caso di e solicitud pa un korpschef nobo, e proceso pa busca un comisario di polis awor lo ta diferente. Esaki pasobra no tin candidato internamente pa e funcion di comisario awor. Algo cu no tabata e caso cu e solicitud pa un korpschef, cu si mester a keda internamente y no por a bai pafo, segun minister di husticia Arthur Dowers.

E funcion di comisario ta bira vacante awor cu Dolfi Richardson ta bira korpschef, ya cu ta un  funcion cu e tabatin prome. Awor cu e posicion ta vacante, den e proximo simanan lo bin avisonan den corant pa e funcion aki. Lo haci esaki den medionan local y den Reino pa por atrae e comisario nobo. E decision pa cual awor si ta busca hende pafo y no paden segun Dowers ta cu a mira den nos cuerpo cu lo bin na remarke pa bira comisario, ta minimo, y cu tin hopi hende jong y no tin hopi hende cu ta bin na remarke pa e funcion aki.

SANTA CRUZ- Cu solamente cuater careda permiti durante di henter e campeonato y un monton anota cu tur hende a perde conteo, nos muchanan di Aruba 1, representa pa North/South League a sa na bay cu e titulo maximo di baseball Latino Americano Senior Division aki na Aruba. Pa un siman largo nos a disfruta di un campeonato cu tabatin Aruba completo den su gara, mirando cu tur dia e stadion  Nadi Croes/Crismo Angela Ballpark, mihor conoci como Winston Veld, tabata chikito pa acomoda tur e hendenan cu a bin mira baseball, specialmente e dos equiponan di Aruba. Pafor di e stadion tabata reina un ambiente familiar, hasta a ser bisa cu pafor tabatin mas ambiente cu paden, enfin un fiesta completo ta loke nos a biba pa un siman largo. Tur presente na e wega final, mester por a sinti su mes orguyoso di por a nace riba e pida baranca aki, e color blou di nos bandera a resalta ayera enorme.