|
Monday, 08 March 2010 |
 
BARCADERA- Pa banda di 1.40 di diadomingo marduga, a sosode un accidente horibel di trafico cu a costa bida di tres miembro di un solo famia, den e caso aki, di un tata y su dos jiunan. Segun version ricibi for di polis, ta mustra cu na altura di Young Fellow Bar na Barcadera, pa banda di 1.40 ta manda un patruya pa un accidente serio di trafico y ora cu nan a yega na e sitio, nan ta bin topa cu dos auto cu a dal den otro. Un auto blanco Toyota Starlet cu number A-35864 cu tabata bahando di San Nicolas y e auto Pirus A-10109 cu tabata bayendo direccion di San Nicolas y dor di e impacto por deduci cu velocidad hopi halto.   Pa motibo desconoci chofer di e auto Toyota A-35864, esta e conocido figura di mundo di drag race, Walter Franken, a bai di repente na su banda robez di caminda y ta haya un impacto formal di e otro auto, den banda di e pasahero. E prome patruya a bati alarma general mesora ya cu e scenario horibel cu nan a bin haya, tabata realmente tristo y impactante y a pidi refuerzo di mas patruya pa sera e caminda y pa no laga publico pasa bin na e sitio di accidente. A cuminza aleha tur hende cu a yega na e sitio pa un distancia grandi, sperando riba yegada di dokter y di miembronan di ambulans, ya cu chofer di e auto A-10109, tabata herida y mester a wordo transporta pa hospital pero su situacion no tabata serio.   FATALIDAD
E tres personanan cu tabata den e auto y kendenan ta fayece al instante, tabata e tata Walter Franken, naci na Aruba 12-12-1962, pues tabatin apenas 42 aña di edad y su dos yiunan kendenan ta Randolf Jose Franken, naci na Aruba 02-08-1990, pues tabata conta cu apenas 19 aña di edad y tambe su jiu muher Lorraine Leonice Franken, nacio na Aruba 12-8-1997, pues apenas tabatin 12 aña di edad.
Tur tres hopi hoben mes pa perde nan bida.
Pa banda di 2.15 dokter Lin cu a presenta na e sitio, a confirma morto di tur tres miembro di famia Franken.
VERSIONNAN
Tabatin varios version di loke por a sosode y entre otro ta ser menciona cu Walter tabata bahando for di Palo Marga caminda el a atende caredanan di drag e anochi ey, hunto cu su dos jiunan y dor cu e tabatin un tire hopi lona, e tabata core poco poco, tratando pa yega cas sin cu e tire a baha.
Un ruman homber di dje tabata coriendo su tras por si acaso pero na e cruzada di Drive Inn, e ruman a bira bai direccion di Santa Cruz pero Walter a sigui bin abou pero aparentemente e tire lo a rementa y el a perde control riba e vehiculo cu a hala bai na e banda robez di caminda, net na momento cu e otro auto tabata biniendo cu velocida halto.
E impacto tabata fuerte y pa gran parti e auto a dal den e jiu homber cu tabata sinta dilanti banda di e tata, y kende a ricibi mayoria di e impacto aki, y a sufri heridanan horibel y mortal y a fayece al instante.
Tanto Walter como su jiu muher dor di e impacto fuerte, a wordo sacudi di tal forma cu nan a fractura nan nek y a fayece tambe al instante.
Cuerpo di Bombero mester a traha oranan largo pa logra saca e victimnan kendenan a keda pega den e ruina di e auto y e proceso aki a bin termina pa banda di 5’or di marduga.
E accidente a conmove henter comunidad ayera y realmente tabata topico di combersacion y di gran lamento tur caminda cu por a bai ayera.
Na famianan di e fayecidonan, ta bai nos mas sincero condolencia y forza pa enfrnta e momentonan tristo y dificil aki.
|
|
Read more...
|
|
|
Saturday, 06 March 2010 |
ORANJESTAD – No mester tin ningun motibo di panico pa cu un posibel temblor y tsunami den e region aki dentro di algun dia. Esaki ta palabra di meteorologo Marc Oduber na Bon Dia Aruba despues di a tende di rumornan di e noticia aki cu ta circulando rond e.o. na Aruba for di diahuebs atardi. E ta descarta esaki y ta mustra cu parti di e noticia ta berdad, pero e parti cu ta creando panico di un temblor mes ta fabrica. Ta trata di un noticia cu ta circula na Spaño unda cu ta bisa entre otro cu ‘.. tur venezolano mester ta den alerta segun expertonan di Chile, Mexico y Merca debi na e temblor cu a sacudi Chile recientemente di 8.8 grado riba scala di Richter. Esaki segun informacion di NASA ta mustra cu e lo a reduci levemente e duracion di dia y a desplaza e plato di tera cu 8cm..”
|
|
Read more...
|
|
|
Saturday, 06 March 2010 |
 
ORANJESTAD – Sindicato di polis SPA ta determina pa trece cambio den e structura di polis y a tuma e prome paso ayera mainta pa logra esaki. Den un reunion ayera mainta na POVA, e sindicato su presidente Guilfred Besaril a presenta un plan na su miembronan cu ta planifica un restructuracion miho cu tur polis lo por biba cune. Esaki despues cu pa ultimo 10 añanan polisnan ta pasando den un restructuracion sin cu nan por keda cla.
|
|
Read more...
|
|
|
Saturday, 06 March 2010 |
ORANJESTAD- For di nos amigo Rudolph St. Jago di Stichting Miniature Sailingboat Aruba nos a bin compronde cu nan lo ta celebrando nos dia nacional di Himno y Bandera, organizando un tremendo careda internacional di botonan miniatura. E competencia lo ta conta cu participacion di botonan for di nos hermana islanan di Corsow y Bonaire, claro cu e coredornan di Aruba tambe lo tey manera un clabo. Nos a bin compronde cu e participantenan di Bonaire lo bini cu un total di 35 boto cu Tiara Air y cu nan lo ta cla pa araza e premionan disponibel. Pero mas cu claro cu Aruba lo ta fuerte na cas, hasta nos a bin compronde cu lo estrena un boto nobo cu nomber di un corant, pues keda pendiente. E evento lo ta di mainta te cu atardi, esaki di 9’or te cu 6’or di atardi. E lugar ta esun di semper esta dilanti Cas di Gobernador. Un yamada ta bay na tur coredor di Aruba pa prepara bon pasobra e competencia lo bay ta uno fuerte. Mas despues nos lo bini cu mas informacion.
|
|
|
Saturday, 06 March 2010 |
  SANTA CRUZ- Awe Diasabra 6 di maart, Fedeveta su temporada di futbol veterano ta cuminza cu e campeonato di 50+ riba tereno di Estrella cu 3 wega y tambe na Nacional lo tin 2 wega. Otro siman e campeonato di 40+ lo inicia riba tereno di Sportboys, Nacional y riba tereno di RCA. E aña aki den e categoria di 50+ tin 11 team participando mientras cu den categoria di 40+ lo tin 17 team. E campeonato di 50+ y 40+ ta wordo hunga un tras di otro pues cada salta un siman. Segun schedule e campeonato di 50+ lo termina dia 28 di Augustus y esun di 40+ dia 4 di september. Despues pa 11 di september e campeonato di 35 plus lo start sali y lo bay te fin di November.
|
|
Read more...
|
|
|
|
|
|
