Tin un grupo chikito di Rubianonan cu hustamente prome cu e crisis di Covid-19 a cuminsa asota tanto Hulanda como Aruba, tabatin plan pa muda bek pa Aruba despues di un tempo bibando na Hulanda. Maske cu 28 di maart ta e ultimo vuelo disponibel entre e paisnan den Reino Hulandes, gobierno di Aruba no a bin na un solucion pa sea haya residencia temporario na Hulanda of pa por inscribi nan mes na Aruba pa por biaha.

Ya desde 17 di maart, net despues cu a anuncia un lockdown completo pa vuelonan biniendo di afo cu excepcion pa residentenan di Aruba pega den exterior, a aparece un informe riba 24ora.com cu un señora, Sharmila Richards, a wordo nenga di aborda cu su vuelo di KLM pasobra Aruba a cera frontera pa tur persona menos residente. Den e video riba e portal di noticia, e señora a bisa cu a purba haya contacto cu Arubahuis, pero cu nan tabata ‘nul comma nul’ y no a yuda di ningun manera. Aworaki cu e ultimo fecha cu tin vuelo entre e paisnan ta mañan, un apelacion urgente ta bay na gobernantenan di Aruba pa bin cu un solucion, pa sea haci un excepcion pa e personanan aki y laga nan drenta Aruba, of pa bin na un areglo pa nan na Hulanda, mirando cu nan no tin residencia, no ta inscribi, y no por keda indefinidamente cerca e poco conocirnan cu nan tin na e pais Europeo.

Bon Dia Aruba a combersa cu un persona cu a prefera di keda anonimo, cu ya pa varios dia ta purbando resolve e problema, sin por haya solucion. E persona aki a purba tuma contacto cu tanto e number di contacto di ATA, Arubahuis, Bureau Rampenbestrijding y Censo, sin por haya resultado. E persona a bisa cu ‘e departamentonan tur ta punta dede riba otro sin yega na un solucion’. El conta cu niun departamento parce tin e autoridad pa dicidi riba un solucion, pero e ta nota cu ‘nan no parce di ta enfoca riba bin cu solucion tampoco’. E rason dicon ta bisa esaki ta pasobra despues di bay di un departamento pa otro, e persona a bin ta compronde cu e problema ta cu ora yega Aruba no lo por bay inscribi den Censo di biaha.

“Nan a bisa mi cu e orarionan di Censo ta limita den cuarentena pero e argumento aki no tin logica. Ta prefera di laga mi como ilegal den un pais unda mi no tin conocirnan, en bes di laga mi bay mi pais bek unda tur mi hendenan ta. Esey ta ridiculo.”, e persona anonimo a expresa.

E persona anonimo ta mira cu e departamentonan di gobierno nan esfuerso pa bin cu un solucion ta ‘nul comma nul’, mescos cu e señora Richards a bisa den su video pa 24ora den direccion di Arubahuis. E persona anonimo ta cuestiona, ‘si gobierno mes tin e informacion, dicon no por busca un manera pa schrijf in e personanan cu ta pega na Hulanda sin ta inscribi? Esaki ta Hulanda. Tin mil regla pa tur cos y no por djis yega inscribi di un dia pa otro’.

Aworaki e situacion ta dificil, pasobra e persona tin recursonan limita mientras e ta na Hulanda. “Mi ta uzando e fondonan cu mi tabatin cla pa huur apartamento na Aruba pa sobrevivi mientrastanto na Hulanda. Si mi mester cumpra mi mesun ticket, mi tin menos pa biba cune mientras e situacion na Aruba mes ta dificil. Mi no ta compronde cu ta laga mi na Hulanda como ilegal en bes di laga mi drenta mi pais bek, mescos cu ta lagando e mas cu 200 persona den exterior.”, e persona anonimo a conclui.

Parce tin un cantidad chikito, di mas o menos 10 persona cu ta den mesun situacion. Bon Dia Aruba lo haci pregunta na gobierno relaciona cu e casonan aki. Nomber di e persona ta conoci pa redaccion.

LEAVE A REPLY

Please enter your comment!
Please enter your name here