Minister di Educacion, Ciencia y Desaroyo Sostenibel, Rudy Lampe a haci un yamado cu den e temporada di crisis aki nos scolnan, docentenan y alumnonan por haci uzo di e sistema di educacion a distancia.
Tambe el a informa cu a dicidi pa prolonga te cu dia 20 di april e ciere di scol. Kiermen te cu vakantie di Pasco Grandi. Nan lo keda monitor e situacion aki causa pa e coronavirus/Covid-19 pa evalua si mester bin cu algun cambio adicional.
Igualmente e muchanan di 6 klas di scol basico no lo haci test pa evalua na cual scol secundario nan lo bay. Sino cu e decision aki lo bini a base di conseho di e mesun scol. Igualmente e fecha pa aplica pa un Arubalening a wordo prolonga pa duna e studiantenan mas chens pa por aplica na dje. Y tambe nan ta duna oportunidad di un periodo di gracia pa esunnan cu mester paga Arubalening.
Esaki ta den otro y den corto algun di e decisionnan cu Lampe a duna di conoce riba tereno di enseñansa. Nan ta cambionan cu a wordo introduci debi na e situacion di e Covid-19 su impacto den nos comunidad. Tur e informacion aki y mucho mas concerni na enseñansa bo por lesa riba e website di departamento di Enseñansa: www.ea.aw.
