Awe mainta, Departamento di Impuesto a haci duna un conferencia di prensa pa duna un actualisacion pa loke ta trata impuesto di vehiculo di motor.

Meverly Romano a informa cu e impuesto aki por wordo paga den dos periodo. E prome fecha ta dia 31 di januari y e otro tabata 30 di juni, pero door di e situacion di coronavirus, e aña aki a wordo extendi te mañan 31 di juli.

Pa loke ta trata e cifranan, Romano a expresa cu 62.223 number di auto ta ful registra, loke ta representa e 70% di 88.927 number registra.

12.982 a paga e prome periodo di aña. Di esaki el a resalta cu e personanan aki te ainda tin un di dia pa haci nan pago prome cu mañan, 31 di juli e fecha final. Ademas el a afirma cu mirando cu tin un cantidad basta grandi cu falta pa nan haci e pago, pa preferiblemente hacie via banco online pa asina e pago por drenta na tempo y por wordo registra tambe na tempo.

Di loke ta trata no cumplimento den henter e aña aki, 9.869 loke ta representa 11% di e cantidad cu nan tin registra, e categorianan cu ta resalta den esaki ta e plachi di categoria A cu un total di 8.935; 81 truck di diesel; 325 brommer; 126 plachinan di number y plachinan V 124. Tambe, Romano a informa cu 3.853 contribuyente a entrega nan plachi di number.

El a haya importante pa trece dilanti y recorda e contribuyentenan cu si nan ta paga e dia 31 di juli den oranan di atardi, e sistema lo tuma e pago pa dia 1 di augustus y na e momento ey e persona lo haya un boet di 50% mas riba e suma di impuesto cu ta falta pa paga.

Tocante control di Polis, Romano a mencion cu Departamento di Impuesto lo bay duna pa Cuerpo Policial un carta despues di 31 di juli cu entrante 1 di september nan por cuminsa controla riba caya y na e momentonan ey, tur e automobilista mester percura pa nan tin nan plachi di number.

Di mesun manera, el a comenta cu nan ta bin trahando cu cierto medidanan pa loke ta trata Covid-19, nan a haci 6 drive thru y un walk in di e cual nan a entrega casi 8.000 plachi durante e dianan ey, aworaki esunnan cu te ainda no tin su plachi number por traha un afspraak via website di departamento pa asina por haya un fecha y busca su plachi.