(AP) — Protesta contra e prohibicion di rednan social na Nepal, cu no a dura mucho, a bira cada bes mas violento ayera, mientras manifestantenan a pega edificio di gobierno y cas di politico na candela y a ataca algun lider.
Prome minister a renuncia memey di critica amplio contra e elite politico di e pais.
Tabata parce cu e renuncia tabatin tiki impacto riba e protesta. Diesmiles di manifestante a keda riba caya te laat, blokeando caminda y invadiendo facilidadnan di gobierno. Helicopter di ehercito mester a transporta algun minister na lugarnan safe.
Un dia prome, manifestacionnan lidera pa hobennan rabia tocante e blokeo di varios website di rednan social a atrapa e capital, y polis a tira cu arma di candela riba e multitudnan, matando 19 persona.
Ayera a elimina e prohibicion, pero e manifestacionnan a continua, impulsa pa rabia tocante e mortonan y acusacionnan di corupcion politico, na e nacion ubica entre China y India.
Mientras e protestanan tabata escala, prome minister Khadga Prasad Oli a anuncia cu e tabata retirando. E presidente a acepta e renuncia y a nombra Oli pa lidera un gobierno demisionario te ora cu tin uno nobo na su lugar – maske no tabata cla ki poder e lo tin ni unda e tabata.
Presidente Ram Chandra Poudel, e cabes ceremonial di estado, a apela na e manifestantenan pa participa den discusionnan pa haya un resolucion pacifico y stop mas escalacion.
Den un mensahe riba video, hefe di ehercito Nepales, Ashok Raj Sigdel a urgi manifestantenan pa stop e manifestacionnan pa preveni mas perdida di bida y propiedad, y pa bin dilanti pa dialogo.
Den un declaracion por escrito despues, ehercito a adverti cu forsanan di seguridad di e pais tabata comprometi pa preserva ley y orden. No tabata cla si ehercito, cu te awo a keda na su kazerne, lo ser mobilisa pa yuda despues cu polis no a logra controla e situacion.
Secretario General di ONU, Antonio Guterres a urgi pa moderacion pa evita mas violencia y a haci un yamado pa tanto un investigacion tocante e eventonan, como pa dialogo pa fomenta “un caminda constructivo bayendo dilanti,” segun vocero di ONU, Stephane Dujarric.
“+Elk a subraya cu protesta mester tuma lugar di manera pacifico, respetando bida y propiedad,” y a haci un yamado pa autoridadnan Nepales cumpli cu derechonan humano internacional, e vocero a bisa.
Enfoke riba gobierno
E manifestacionnan – yama e protesta di Gen Z – a cuminsa despues cu gobierno a blokea plataforma, incluyendo Facebook, X, y YouTube, bisando cu e companianan a faya di registra y somete na supervision di gobierno.
Pero e protestanan a amplia pa refleha mas malcontento. En particular, hopi hoben ta rabia cu e yiunan di lidernan politico – asina-yama nepo babies – ta parce di disfruta estilonan di bida luhoso y cantidad di bentaha, mientras mayoria di hoben tin dificultad pa haya trabao. Cu desempleo entre hoben alcansando alrededor di 20 porciento aña pasa, segun Banco Mundial, gobierno ta calcula cu mas di 2mil hoben ta bandona e pais cada dia pa busca trabao den Medio Oriente of sur di Asia.
“Mi ta akinan awe pa protesta contrae corupcion masivo na nos pais,” segun Bishnu Thapa Chetri, un studiante. “E pais a bira asina malo cu pa nos hoben, no tin base pa nos keda.”
Video comparti riba rednan social a mustra manifestantenan batiendo lider di Congreso Nepali, Sher Bahadur Deuba y su esposa, Arzu Rana Deuba, e actual minister di Exterior. Ambos tabata mustra di ta na sanger, mientras un video a mustra e lider di e partido hayando ayudo pa bay un lugar sigur. E partido ta esun mas grandi di pais y ta parti di e coalicion den gobierno.
Medionan local y video riba rednan social tambe a mustra manifestantenan atacando edificio di gobierno y e residencianan di lidernan politico durante diamars.
E palacio presidencial, residencia oficial di prome minister, y un edificio unda tin oficina di prome minister y varios ministerio, tur a keda pega na candela. Huma diki a subi for di edificio di oficina di prome minister.
Anteriormente, a pega cas priva di Oli na candela, igual cu cas di e presidente, minister di Interior y pareha Deubas. Cas di lider di oposicion, Partido Comunista di Nepal (Maoista), tambe a ser pega na candela.
Algun manifestante a culpa gobierno pa e hecho cu polis a tira riba e manifestantenan, y a exigi retiro di e prome minister cada bes mas impopular.
“Nos ta akinan pa protesta pasobra nos hubentud y amigonan ta siendo mata. Nos ta akinan pa mira cu ta haci husticia y pa retira e regimen actual,” segun Narayan Acharya, kende tabata ente e manifestantenan pafo di e muraya kibra di edificio di Parlamento diamars. “K.P. Oli mester wordo persigui.”
Polis ta tira riba multitud
Dialuna, rallynan a aumenta na diesmiles di persona na Kathmandu y multitudnan a rondona edificio di parlamento prome cu polis a tira riba e manifestantenan.
“Stop e prohibicion di rednan social. Stop corupcion, no rednan social,” e manifestantenan tabata grita, mientras ta zwaai bandera nacional.
Ademas di e 19 fatalidad, cantidad di hende a resulta herida.
Prome cu el a renuncia, Oli a bisa cu e lo forma un comite di investigacion cu lo entrega un rapport riba e tiramento den 15 dia. El a agrega cu lo duna compensacion na famia di esnan cu a ser mata, y cu e heridonan lo ricibi tratamento gratis.
Prohibicion di rednan social
E violencia a desenvolve mientras gobierno di Nepal ta haci un intento mas amplio pa regula rednan social cu un ley destina pa sigura cu e plataformanan ta “maneha adecuadamente y responsable.”
E propuesta a ricibi critica amplio como un herment pa censura y pa castiga oponentenan di gobierno cu ta expresa nan protesta online.
E ley lo rekeri pa companianan nombra un oficina liaison of punto di contacto na e pais.
Gruponan di derecho a yam’e un intento di gobierno pa limita libertad di expresion y derechonan fundamental.
E rekisito di registracion a aplica na alrededor di dos decena di rednan social usa ampliamente na Nepal. Ni Google, cu ta doño di YouTube, ni Meta, compania mama di Facebook, Instagram y WhatsApp, a responde na solicitud pa comentario di Associated Press. Plataforma X di Elon Musk tampoco a responde.
TikTok, Viber y tres otro plataforma a registra y ta opera sin interupcion.
Na 2023, Nepal a prohibi TikTok pa interumpi “harmonia social, bon boluntad y disemina material indecente.” E prohibicion a keda retira aña pasa, despues cu ehecutivonan di TikTok a priminti di cumpli cu leynan local, incluyendo un prohibicion riba website pornografico cu a pasa na 2018.
