Corte Supremo di Hulanda a rechasa e apelacion den caso Avestruz, den cual e sospechoso principal ta ex-minister di AVP, Benny Sevinger. E decision emiti ayera, 14 di april 2026, ta confirma cu e sentencia anterior di Corte di Apelacion, cu ta encera acusacionnan di soborno, fraude, abuso di poder y labamento di placa relaciona cu e otorgamento di derechonan di tereno riba e isla, ta keda vigente.

Caso Avestruz ta consisti di tres caso interconecta deriva di e investigacion di corupcion di alto perfil na Aruba y ta draai rond di sospecho di pagonan ilicito y beneficionan brinda na e ex-minister a cambio di decisionnan faborabel cu ta regarda terenonan erfpacht. E investigacion a examina transaccionnan y conducta cu ta data for di e periodo entre 2014 y 2017.

Den tur tres caso, Corte Supremo a rechasa e apelacion treci pa e acusadonan, concluyendo cu e kehonan lanta no tabata garantisa pa anula e sentencianan anterior. Haciendo esaki, corte a depende pa gran parti riba e rasonamento di e Abogado General y, den algun instancia, a aplica articulo 81 di Ley di Organisacion Hudicial Hulandes, cu ta permiti corte pa rechasa apelacionnan sin rasonamento detaya ora nan no ta lanta asuntonan di importancia huridico mas amplio.

Soborno activo di un funcionario publico

Un di e sentencianan central ta concerni un caso cu ta encera presunto soborno activo di un funcionario publico. Segun e dossier di e caso, e sospechoso a ser acusa di a percura pa un suma di placa ser entrega na e minister di e tempo ey pa medio di un intermediario, cu e meta pa sigura derecho di erfpacht pa parcela di tereno na Aruba.

A bisa cu a entrega e presunto pago na casa di e minister na januari 2016.

E defensa a lanta varios obhecion den casacion, incluyendo argumentonan tocante e suficiencia y confiabilidad di testimonio di testigo, e interpretacion di rapportnan di polis, y e conclusion cu e pago en berdad a tuma luga riba e fecha specifica. Sinembargo, Corte Supremo a haya cu e kehonan aki no a mina e conclusionnan cu e corte mas abao a yega na dje.

Den su evaluacion, corte a acepta cu e testimonio di un testigo clave tabata sosteni adecuadamente pa otro evidencia, incluyendo datonan di telecomunicacion y resultadonan investigativo. Corte tambe a rechasa e acusacionnan cu cierto conclusionnan di polis tabata constitui speculacion impermisibel, determinando cu nan tabata basa riba hechonan observabel y a ser interpreta rasonablemente door di e corte di prome instancia.

Ademas, Corte Supremo a sostene e determinacion di e corte mas abao cu e acusado a actua cu intencion di soborna. E evidencia a ser considera suficiente pa establece un vinculo entre e pago y decisionnan siguiente relaciona cu derechonan di tereno, incluyendo e otorgamento di un opcion y e eventual benta di accionnan conecta na e tereno en cuestion.

Soborno y labamento di placa

Den e di dos caso, corte a analisa acusacionnan di actonan adicional di soborno y labamento di placa cu ta encera transaccionnan financiero significante. E sospechoso a ser acusa di a haci pagonan pa construccion di un gym, instalacion di un porta, y renobacionnan na residencia di e ex-minister, atrobe a cambio di trato faborabel den alocacion di tereno. E caso tambe tabata encera acusacionnan di labamento di mas cu 1.3 miyon dollar Mericano.

Aunke partinan di e acusacionnan aki a resulta den vrijspraak den e fase inicial di huicio, Corte di Apelacion a sostene otro aspecto di e acusacionnan. E acusadonan a apela e resultadonan aki den casacion, argumentando cu e evidencia tabata insuficiente pa sostene e condenanan.

Corte Supremo a rechasa e apelacion sin rasonamento detaya, invocando articulo 81. El a declara cu e kehonan no a lanta preguntanan cu ta rekeri mas aclaracion huridico y cu nan tabata insuficiente pa anula e sentencia di apelacion.

Fraude, soborno pasivo y abuso di funcion

E di tres caso a enfoca riba e accionnan di e ex-minister, Benny Sevinger, kende a enfrenta acusacionnan incluyendo fraude, soborno pasivo, y abuso di funcion. Fiscalnan a alega cu e ex-minister, den cooperacion cu otronan, a facilita e otorgamento incorecto di derechonan di tereno y a acepta beneficio financiero a cambio.

Un tema clave cu a bin dilanti den casacion tabata tocante e caracterisacion legal di fraude. E defensa a argumenta cu corte a conclui incorectamente cu e acusado por ta simultaneamente e autor di fraude y e partido induci pa traspasa propiedad. Corte Supremo a rechasa e argumento aki, bisando cu e tabata basa riba un mal lesamento di e sentencia di e corte mas abao.

Di acuerdo cu e sentencia, Corte di Apelacion a determina cu otro individuonan—specificamente funcionarionan publico den e Departamento di Infrastructura y Planificacion—a ser engaña pa duna e derechonan di tereno. Como resultado, tabata pais Aruba, pa medio di su funcionarionan, cu a ser induci pa traspasa e derechonan, no e acusado personalmente.

Corte Supremo a conclui cu e rasonamento di e corte mas abao riba e punto aki tabata sano y cu e evidencia a sostene e resultadonan di fraude, soborno y abuso di funcion. Mescos cu e otro casonan, corte a rechasa e apelacion na final.

Den tur tres decision, Corte Supremo a enfatisa cu e asuntonan treci dilanti den casacion no tabata merece intervencion. Den varios instancia, a tuma nota cu mas splicacion no tabata necesario pasobra e kehonan no tabata relaciona cu e desaroyo of consistencia di e ley. E enfoke aki ta refleha e rol di e corte como un Corte di Casacion, cu ta enfoca principalmente riba preguntanan huridico en bes di reevalua determinacionnan factual haci pa cortenan mas abao.

Caso Avestruz tabata un di e investigacionnan di corupcion mas significante den ultimo añanan den e parti Caribense di Reino Hulandes, cu tabata involucra multiple acusado y un rango amplio di supuesto delitonan.

Cu e decision aki, Corte Supremo di Hulanda a pone punto final na e caso di corupcion Avestruz. E sentencia di Corte di Apelacion ta keda vigente. Esaki ta nifica cu Benny Sevinger a ser condena na 48 luna di prison, di cual 12 luna ta condicional, cu un periodo di prueba di tres aña. Ademas, pa un periodo di seis aña despues cu e cumpli su castigo, e no lo por traha den gobierno ni participa den eleccion como candidato politico. Tambe e tin obligacion di paga back casi 800 mil florin, un suma cu el a gasta sin por a demostra con el a haya e placa aki.

Reaccion di partido AVP

“Fraccion AVP a tuma nota di e sentencia pronuncia awe den e caso Avestruz y cu ta involucra Sr. Benny Sevinger” e partido a bisa den un reaccion oficial. “Nos ta reconoce cu Aruba ta un Estado di Derecho, unda e sistema hudicial tin su propio proceso independiente y cu e sistema mester haya espacio pa haci su trabao. Den e contexto aki, fraccion AVP kier expresa nan sincero empatia y apoyo na nan colega, parlamentario Stephany Sevinger, y na tur su famia durante e periodo dificil aki. Nos ta respeta su privacidad y dignidad mientras nan ta procesa e situacion, y ta spera otronan haci mescos. Fraccion AVP ta reafirma su compromiso cu transparencia, integridad y bon gobernacion. Na mes tempo, nos ta mira cu interes cu e autoridadnan hudicial continua y acelera e investigacion y tratamento di e diferente casonan di presunto corupcion cu ainda ta pendiente, pa asina fortalece confianza di nos pueblo den e Estado di Derecho.”