Diasabra pa 6:45 di mainta, Central di Polis ta keda informa cu un auto lo mester a alcansa un peaton na altura di ex-Xavier University na Santa Helenastraat.

Polis y ambulance a keda despacha pa e lugar di e sucedido cu maximo urgencia.

Na yegada di patruya di polis ta constata cu berdad un auto, Toyota Corolla blanco a alcansa un peaton. E peaton ta grave y no ta reaccionando y e chauffeur a bandona e sitio.

Personal di ambulance a duna asistencia medico na e señora (peaton) pero lamentablemente no por a haci nada mas p’e y e señora ta fayece na e sitio.

Specialista di trafico y polis tecnico a presenta pa haci nan investigacion. Departamento di Slachtofferhulp tambe a presenta na e sitio pa brinda sosten na e famia.

E chauffeur envolvi den e accidente fatal a entrega su mes y polis a deten’e. A test e chauffeur y e la supla cero riba e mashin di alcosensor.

Dr. forensico Wemeijer a constata morto di e señora victima: Liris Aurelia Senior Barrios naci na Colombia dia 25 September 1959. (66 aña).

E señora ta bira di 5 morto den trafico pa aña 2026.

Cuerpo policial y Bon Dia Aruba ta manda palabra di condolencia na famia di e fayecido.

Patronchinan persistente

Durante ultimo cinco aña, cifranan di fatalidad den trafico a varia, pero e causanan subyacente tras di accidente mortal a mustra un continuidad notable. Datonan di Ministerio Publico (OM) y reportahenan den medionan local ta punta ripitidamente riba coremento bao influencia y comportamento di hit & run como problemanan persistente y sin resolve riba camindanan di nos isla.

Durante periodo di cinco aña di 2021 te 2025, Aruba a registra mas di 50 fatalidad den trafico, cu casonan di coremento bao influencia aumentando notablemente entre 2021 y 2023, y comportamento di hit and run ripitidamente presente den datonan oficial y reportahe di suceso.

Loke ta resalta ta no solamente e cantidad di morto, sino e consistencia di e factornan di riesgo. Coremento bao influencia di alcohol a keda prevalente a pesar di accionnan di polis, mientras e disponibilidad di e chauffeurnan pa bandona escena di accidente ta punta riba un problema mas profundo di evasion di responsabilidad y disuasion.

Pa legisladornan y agentenan di ley, e ultimo cinco aña ta sugeri cu morto den trafico na Aruba ta resultado di patronchinan di comportamento cu a proba di ta resistente pa intervencionnan a corto plaso. Pa e motibo aki, comunidad ta exigiendo un cambio urgente den procesamento, enhuiciamento y castigo di e casonan aki.