Den e prome kwartaal di 2026, e Ombudsman di Aruba a primeramente ricibi keho tocante e falta di respuesta di agencianan gubernamental y mal comunicacion segun e cifranan cu Ombudsman a publica e siman aki.

Manera ta conoci, Aruba a haya su prome Ombudsman den e reunion di dia 8 di juli 2024 ora cu Parlamento di Aruba a nombra Mr. Jurima A.R. Bryson pa asumi e posicion di Defensor di Pueblo di Aruba, esta Ombudsman. E Ombudsman ta un autoridad independiente y imparcial. Landsverordening Ombudsman (LvO) ta bisa cu entre otro, e Ombudsman ta encarga pa sigura cu instancianan publico y priva trata personanan hustamente, adecuadamente y cu respet.

Tambe e ta provee informacion y guia riba standardnan di bon gobernacion (“behoorlijk bestuur”), ta crea rapportnan pa conseha instancianan ora nan no actua di manera adecua y ta pone atencion special riba derechonan di mucha.

Pa loke ta trata e proceso di tuma keho, ciudadanonan por entrega keho cerca oficina di Ombudsman contra instancianan cu ta (parcialmente) subsidia pa gobierno y tambe instancianan priva na Aruba. E kehonan aki ta sigui un trayecto den cual lo clasifica cada keho segun e tema cu e toca. Despues di esaki, Ombudsman lo haci un evaluacion di e situacion, den cual lo por traha un rapport y hasta acerca e instancia concerni. Di e manera aki, Ombudsman por duna su conseho na e instancia.

Ta importante si pa menciona cu na momento cu hala atencion di e instancianan pa nan mal trato di e kehado, nan ta obliga pa ley pa duna un splicacion di e situacion y si lo sigui e conseho di Ombudsman sinembargo, a enfatisa cu pa loke ta aplicacion di e conseho, aunke Ombudsman no tin mucho poder, si e por trece e situacion na un nivel mas halto, sea na minister of otro autoridadnan concerni.

En total, e mayoria di e kehonan entrega den e prome kwartaal di e aña aki tabata pa motibo cu autoridadnan no a responde, of a responde di manera inadecua, na peticion di cudadanonan. Adicionalmente, den un cantidad di caso e ta trata e fracaso di manda informacion na e autoridad corecto, cual ta un obligacion cu ta aplica dentro di gobierno.

Tambe a tuma luga un instante unda un institucion a rechasa di procesa un keho, aunke esaki a sucede cu un frecuencia relativamente abao. Den otro casonan, e motibonan tabata diverso y no tabata cay bao di un categoria specifico.

Na final, no ta tur keho a ricibi tratamento of siguimento. E motibo principal pa esaki ta cu e ciudadano prome mester contacta e autoridad relevante mes prome cu Ombudsman por tuma un caso, y den 6 di e casonan mira, no a sigui e proceso adecua. Ademas, algun di e kehonan ya caba tabata bao tratamento di otro autoridadnan, tabata mas bieu cu 1 aña of e kehadornan a retira e keho nan mes.

Segun Ombudsman, casi mita di tur keho, alrededor di 46.7%, a ricibi tratamento dentro di 3 luna.