Mediante un comunicado di prensa, Cuerpo Policial di Corsou a informa tocante un accidente grave di trafico den cual un peaton a perde su bida. E victima tabata un Arubiano cu tabata biba na Corsou pa algun aña.
Segun e comunicado di polis, ayera 28 di april, pa alrededor di 1:41am, Central di Polis a ricibi informacion di un accidente grave cu a tuma lugar na Helmin Magno Wiels Boulevard na haltura di entrada di un centro comercial. Un vehiculo a alcansa un peaton.
Na yegada di e prome unidad policial, a haya un homber riba caya cu multiple herida na su curpa. Inmediatamente a pidi presencia di ambulance pa transporta e victima pa sala di emergencia di Centro Medico Corsou.
Lamentablemente, pa alrededor di 7:10am, Central di Polis a ricibi informacion cu e victima a fayece a consecuencia di e golpinan cu el a sufri durante e accidente.
Personal di departamento di trafico ta investigando causa di e accidente.
Na Aruba, a identifica e fayecido como Marco Maduro, un Arubiano cu tabatin algun tempo ta biba na Corsou.
Bon Dia Aruba ta manda sincero palabra di condolencia na famia y sernan keri, y cu Marco Maduro sosega na paz.
