Expertonan ta adverti cu influencia creciente di ‘manosfera’ riba mucha homber por stimula delitonan violento y sexual

(NLTimes)—Mas mucha homber y hombernan hoben cu comportamento problematico y violento ta ser influencia pa e manosfera, segun De Waag, e institucion di salud mental forensivo mas grandi di Hulanda.

Tur aña, aproximadamente 800 mucha homber ta haya tratamento na e institucion pa comportamento transgresivo, NOS ta reporta. De Waag ta calcula cu tres cuarto parti di e muchanan aki a bin den contacto cu e manosfera.

Segun personal, e manosfera por encurasha hobennan masculino pa desaroya desconfiansa contra trahadornan femenino, haciendo comunicacion hopi dificil.

E ‘manosfera’ ta un espacio online unda hende homber ta expresa perspectivanan anti-femenista y ta promove comportamento machismo. Gruponan dentro di e espacio aki frecuentemente ta tira culpa riba feministanan, of hende muher en general, pa varios problema den sociedad. Sentimentonan amargo contra hende muher—y den algun caso odio y violencia—frecuentemente ta ser encurasha.

Un ehempel famoso, aunke no e unico, ta influencia Mericano-Britanico Andrew Tate, ken a enfrenta cargonan criminal na Rumania relaciona cu acusacionnan di crimen organisa y trafico di hende pero no a ser condena.

“Casi 40 porciento di adolescentenan ta asina influencia pa e manosfera cu e por ta considera un factor di riesgo. Esaki ta nifica cu, parcialmente debi na e influencia aki, nan ta mustra comportamento transgresivo y ta den riesgo halto di haci esaki,” segun Larissa Hoogsteder, director di asunto di tratamento na De Waag y profesor di diagnostico y tratamento ortopedagogico forensico na Universidad di Amsterdam, a conta NOS.

Segun e, e muchanan homber ta particularmente vulnerable: nan ta sensitivo pa elogio, kier sinti cu nan ta pertenece, ta actua riba impulso y ta facilmente infuencia.

E influencia aki ta sucede frecuentemente via plataformanan manera Telegram y Reddit. E comportamento di e muchanan den cuestiona por resulta den varios crimen. De Waag ta mirando un aumento significante den casonan envolviendo ‘sextorsion’, como tambe crimennan violento y di propiedad. “E crimennan aki ta ser cometi parcialmente bao influencia di e manosfera,” Hoogsteder a bisa.

“E manosfera ta un problema complica; actualmente nos ta mirando un pida chikito di e mundo aki,” Minerva Ishak a bisa, ken ta un psicologo clinico na Transfore y ta duna cuido forensico, specialisando den extremismo y radicalisacion.

Institucion forensico Fivoor tambe ta reporta un aumento den hobennan afecta pa e manosfera y ta comparti nan preocupacion. “E influencia ta cuminsa na edad jong, ora hende bin den contacto cu e mundo online,” psikiatra y director di cuido di pashent Rosalind van der Lem a conta NOS.