E siman aki Corte Comun di Husticia (Hof) a emiti un sentencia intermediario den e apelacion di Amsterdam Manor entre e hotel, Pais Aruba y Aruba Wastewater Sustainable Solutions (AWSS) tocante maneho di e planta di tratamento di awa na Bubali. Hof a nota algun problema procedural den Amsterdam Manor su apelacion, expresando entre otro duda si Pais Aruba ta responsable pa e maneho di e planta.

Desde añanan 1990, Amsterdam Manor Beach Resort ta den un bataya legal largo cu Gobierno di Aruba tocante e planta di tratamento di awa sushi na Bubali, cual ta situa patras di e hotel y a causa mal holor den e area durante decadas.

E hotel tin basta tempo ta argumentando cu e planta ta sobrecarga y no ta bon manteni. Mal maneho di e awa sushi cu ta drenta e planta a causa disgusto entre local y turistanan den e area y hasta infestacion di musca na e hotel pa hopi aña.

Durante añanan varios corte a dicta na fabor di Amsterdam Manor, hayando cu gobierno di Aruba no a logra tuma medidanan adecua pa preveni molester pa e hotel. Gobierno a haya orden repetidamente pa mehora y mantene e planta, instala y repara ekipo, aplica metodo di tratamento biologico, y compensa miyones di florin na Amsterdam Manor pa dañonan causa. Tambe el a acumula mas cu 700.000 florin den multa imponi pa corte pa no cumpli cu ordennan na tempo.

Background corto di sentencia intermediario mas recien

E sentencia intermediario cu recien a ser emiti ta relaciona cu un serie di apelacion di Amsterdam Manor, Pais Aruba y AWSS despues di e ultimo veredicto di corte na fabor di Amsterdam Manor na mei 2024. E tempo ey, corte a duna orden na Pais Aruba pa:

  • Mantene varios ekipo trahando, incluyendo aerators y borstelbeluchters
  • Kita lodo y scuma cu ta surgi regularmente
  • Conduci test di awa sushi y comparti e resultadonan
  • Duna raportahe semanal riba operacion di e planta na Amsterdam Manor
  • Instala capacidad temporal pa 1 di september 2024, suficiente pa procesa al menos 12.000 meter cubico di awa sushi pa dia.

Si no cumpli cu cada orden, Pais Aruba lo enfrenta multa di minimo 25.000 florin y maximo 500.000 florin pa dia of parti di dia.

Loke a sigui ta un serie di apelacion entrega, unda na dado momento Amsterdam Manor a entrega su apelacion contra ambos Pais Aruba y AWSS, ken tabata co-acusado na Corte den Prome Instancia. Dia 16 di september 2025, Pais Aruba, Amsterdam Manor y AWSS a entrega documentonan di suplicacion na corte.

Kico corte ta bisando awo

Den e sentencia emiti dia 4 di juni 2026, Corte Comun a nota algun buraco procedural den e apelacion di Amsterdam Manor Beach Resort.

Pa prome, corte a bisa cu e tin falta di documento di Manor Beach, notablemente esun entrega na mei 2025. Corte a pidi abogadonan pa manda e documentonan atrobe pa por evalua nan.

Corte tambe a dicidi cu Manor Beach no tabata permiti di apela contra AWSS, ya cu e entidad mes nunca a entrega un apelacion. Pa e motibo aki, Manor Beach no por a usa e tipo di procedura di apelacion aki contra AWSS.

Corte a señala cu Manor si por a entrega un apelacion separa contra AWSS, pero cu e mester a haci esaki dentro di e deadline legal di tres siman. En bes di haci esey, Manor Beach a purba hinca AWSS den un apelacion mas despues den e proceso. Corte ta haya cu esaki no ta legalmente permiti.

Un otro problema a surgi den Manor Beach su declaracionnan contra Pais Aruba. Corte a punta na otro caso entre Manor Beach y gobierno di Aruba unda a duna veredicto dia 31 di maart 2026. Den e caso ey, a bisa sin disputa cu gobierno a stop di tin autoridad riba e planta di tratamento di awa desde 1 di juli 2024.

Corte ta bisando awo cu si esey ta berdad, gobierno no por tuma responsabilidad pa e maneho di e facilidad. Di e manera aki, e declaracionnan di Manor contra Pais Aruba lo automaticamente ser considera invalido.

Mester enfatisa cu esaki ta un bista preliminar cu corte a duna, no un veredicto den e caso.

Corte awor ta duna chance na ambos partido pa responde riba e dos asuntonan aki: Si Manor Beach su apelacion contra AWSS ta valido. Y si e hecho cu gobierno no tin autoridad mas riba AWSS ta nifica cu e declaracionnan mester ser considera invalido.

Ambos partido mester entrega nan argumentonan dia 9 di juni 2026.