Aruba ta sigui mantene un surplus financiero cu ta pasa ampliamente e norma legal, a pesar di introduci medidanan nobo pa limita e impacto economico di e crisis actual den Medio Oriente. Asina Colegio di Supervision Financiero (CAft) den su conseho recien riba e prome cambio di presupuesto di 2026.

Den su evaluacion CAft a conclui cu e posicion fiscal di Aruba ta keda solido. Segun e Colegio di supervision financiero, sector colectivo ta proyecta pa registra un surplus di financiamento di 2.5% di e Producto Interno Bruto (GDP), cual ta riba di e minimo legal di 1% estableci den e marco di supervision financiero di Aruba.

Den su conseho, entrega na minister di Finanzas, Asuntonan Economico y Sector Primario, Geoffrey Wever fecha 13 di mei 2026, CAft ta indica cu gobierno a usa parti di e espacio presupuestario identifica den e presupuesto 2026 aproba pa financia medidanan cu mester yuda reduci e efectonan economico di e tensionnan geopolitico den Medio Oriente.

Aunke CAft ta reconoce cu ta importante pa mantene suficiente margen den presupuesto mirando e incertidumbre global, e Colegio tambe ta opina cu e momento den cual e espacio fiscal aki a ser usa no ta completamente conforme cu reglanan presupuestario cu ta aplica bao di Landsverordening Aruba tijdelijk financieel toezicht (LAft).

E cambio presupuestario ta enfoca principalmente riba e consecuencianan economico potencial di e conflicto den Medio Oriente, particularmente pa loke ta trata prijs di combustible, inflacion y turismo. Como parti di su contesta, gobierno ya a introduci un reduccion temporal di accijns riba combustible pa un periodo di dos luna. E medida aki ta representa un perdida calcula di AWG 5 miyon den entrada fiscal.

Gobierno tambe ta considera otro medidanan di apoyo, aunke ningun decision definitivo ainda no a ser tuma. Pa prepara pa eventual intervencionnan adicional, AWG 29 miyon a ser reserva den e presupuesta amienda. Entre e opcionnan cu ta ser evalua tin vriesmento di prijs di productonan cu ta forma parti di Canasta Basico y mitigacion di e aumento di prijs pa gas domestico. Si e medidanan aki ser implementa, gobierno lo compensa proveedornan pa e costo adicional di importacion y compra causa pa e crisis.

Segun CAft, e medidanan relaciona cu e crisis, combina cu otro ahustenan den presupuesto, ta resulta den un deterioro di AWG 40.3 miyon den saldo di financiamento di Aruba, ekivalente na aproximadamente 0.5% di GDP. Como consecuencia, e surplus nacional proyecta ta baha for di 1.5% di GDP den e presupuesto aproba pa 1% den e version modifica.

No obstante, e posicion financiero general di Aruba ta keda positivo. Gobierno ta proyecta un surplus di financiamento di AWG 81 miyon pa 2026, mientras cu sector colectivo lo logra un surplus di AWG 208 miyon.

Sector colectivo ta inclui tanto gobierno central como varios entidad publico y fondo social. CAft ta señala cu gran parti di e resultado positivo ta bin for di institucionnan manera Algemene Ziektekosten Verzekering (AZV) y Sociale Verzekeringsbank (SVb). AZV ta calcula un surplus di AWG 72 miyon pa 2026, mientras cu SVb ta proyecta un resultado positivo di AWG 62 miyon. Aruba Tourism Authority (ATA) tambe ta anticipa un miho resultado cu un surplus di alrededor di AWG 12 miyon.

CAft ta considera e surplusnan aki como un oportunidad pa fortalece mas e base financiero di e pais. Segun e Colegio di supervision, e resultado positivo genera door di entidadnan publico por eventualmente ser usa pa reduci debe publico. Sinembargo, e acuerdonan necesario pa haci esaki posible ainda no a ser formalisa.

CAft ta subraya tambe cu e ambiente economico mundial ta keda incierto. Si instabilidad den Medio Oriente dura mas tempo, esaki por sigui tin efecto riba prijsnan di energia, presion inflacionario y demanda turistico. Mirando cu Aruba ta depende grandemente di turismo y importacion, desaroyonan internacional por afecta crecemento economico y entrada gubernamental.

Un parti importante di e conseho ta trata e aplicacion di reglanan fiscal. CAft ta recorda cu den e presupuesto original pa 2026, Aruba tabata proyecta un surplus di financiamento di 1% di GDP. Durante e proceso di aprobacion, calculacionnan actualisa y tendencia economico positivo a resulta den un surplus proyecta di 1.5% di GDP.

Gobierno ta argumenta cu e cambio presupuestario actual no ta basa riba ganashi inespera durante e aña, sino riba un decision consciente pa asigna espacio fiscal cu ya tabata identifica durante preparacion di e presupuesto aproba. Segun gobierno, e strategia aki a permiti entrega e presupuesto na tempo mientras cu autoridadnan tabatin mas tempo pa determina con pa usa e recurso disponibel.

CAft a tuma nota di e splicacion aki, pero ta opina cu e enfoke mester a ser comunica mas claramente durante e preparacion di e presupuesto original. Segun e Colegio, un splicacion mas amplio por a evita confusion tocante cumplimento cu e reglanan fiscal estableci den e LAft.

Bao di e reglanan actual, medidanan nobo cu tin impacto financiero normalmente mester ser compensa cu spaarmento na otro lugar of cu entrada adicional. CAft ta observa cu Aruba a destina AWG 40.3 miyon pa medidanan nobo cu no tabata inclui den e presupuesto aproba, mientras cu e surplus proyecta a baha di 1.5% pa 1% di GDP sin presenta compensacion comparable den otro area.

Pa mehora e proceso di preparacion presupuestario den futuro, gobierno a indica cu lo colabora cu Caribbean Regional Technical Assistance Centre (CARTAC), un organismo regional afilia cu Fondo Monetario Internacional (IMF). E meta ta pa fortalece metodonan di pronostico y calculacion presupuestario pa proyeccionnan mas preciso ta disponibel na un etapa mas tempran den e ciclo presupuestario.

Ademas di gastonan operacional, e presupuesto modifica tambe ta inclui varios ahuste relaciona cu inversion y gasto di capital.

Gobierno ta propone un aumento di AWG 13.5 miyon den gastonan di capital. Di e suma aki, AWG 11 miyon ta destina como prestamo nobo na Fuels Marketing & Supply Aruba N.V. (FMSA). E financiamento ta destina pa desmantelacion di algun structura situa riba e tereno di ex refineria. Otro AWG 2.5 miyon ta reserva pa e Algemeen Investerings- en Ontwikkelingsfonds (AIOF), un fondo di inversion y desaroyo cu ainda no a ser formalmente estableci.

CAft a bolbe expresa preocupacion tocante e retraso den establecimento di AIOF. Segun e Colegio di supervision, e fondonan asigna no por ser utilisa te ora cu e fondo ta oficialmente operativo, loke por causa retraso den proyectonan di inversion. E nivel di inversion publico ta keda relativamente abao, y pa e motibo ey CAft ta ripiti su recomendacion pa acelera creacion di e AIOF y desaroyo di un agenda di inversion multianual.

CAft tambe ta enfatisa e importancia di fortalece preparacion di proyecto, planificacion y capacidad di ehecucion pa garantisa cu inversionnan publico por ser realisa eficientemente y na tempo.

Otro punto menciona den e conseho ta relaciona cu e debe publico di Aruba y composicion di sector colectivo. CAft ta calcula cu e debe di Aruba lo ta ekivalente na aproximadamente 57% di GDP na final di 2026. Sinembargo, e composicion oficial di sector colectivo pa e aña ey ainda no a ser finalisa.

Debi na falta di esaki, CAft ta indica cu e no por evalua completamente e posicion di debe di sector colectivo den su totalidad. P’esey, e Colegio ta urgi autoridadnan pa completa e proceso aki cu prioridad.

Den su recomendacionnan formal, CAft ta pidi gobierno pa sigura cu espacio fiscal ta ser usa na e momento adecua den e proceso presupuestario, acelera establecimento di AIOF, finalisa e definicion di sector colectivo y distingui claramente entre medidanan temporal di crisis y intensificacion permanente di politica den cambionan presupuestario den futuro.

A pesar di e observacionnan critico, e tono general di e conseho ta positivo. Finanzas publico di Aruba ta sigui supera e exigencianan minimo di e marco di supervision fiscal, y sector colectivo ta proyecta pa mantene surplus considerable durante e añanan binidero.

CAft ta proyecta cu e surplus di sector colectivo lo keda riba 1.9% di GDP te 2030. A pesar di resultado fiscal positivo, e Colegio di supervision ta enfatisa cu Aruba mester sigui maneha su finanzas cu cuidao pa enfrenta e incertidumbre economico mundial.