Recientemente, Oficina Central di Estadistica (CBS) a publica e Indice di Prijs di Consumo pa luna di Mei 2026.

E CPI pa luna di mei 2026 ta 111.90, loke ta representa un aumento di 1.0% compara cu e indice di april 2026 (110.78). E cambio di e CPI pa e ultimo diesdos (12) luna (mei 2025 te cu mei 2026) ta 2.1%, un aumento di 2.0 punto di porcentahe (ppt) compara cu e periodo corespondiente di aña pasa (0.1%).

E promedio anual (ultimo 24 luna) di e tasa di inflacion pa e periodonan di mei 2024 te cu mei 2025 y mei 2025 te cu mei 2026 ta 0.4%, un caida di 0.7 ppt compara cu e 1.1% registra den e periodonan di mei 2023 te cu mei 2024 y mei 2024 te cu mei 2025.

Durante e luna aki, nuebe (9) di e diesdos (12) sectornan a registra aumento di prijs.

E aumentonan cu tabatin e mayor efecto riba e CPI a ser registra pa e sectornan di “Transporte” (3.3%), “Paña y sapato” (12.9%) y “Comunicacion” (2.7%), causando un efecto di respectivamente, 0.44, 0.25 y 0.25 ppt. E aumentonan den e sectornan restante a contribui cu un efecto di 0.32 ppt riba e CPI di mei 2026.

E aumentonan aki a ser contraresta parcialmente door di principalmente un caida den e indice di e sector di “Mobilario” (-3.1%), cu a contribui cu un efecto di -0.25 ppt riba e CPI di mei 2026. E caida den e sector restante a contribui cu un efecto insignificante riba e CPI di mei 2026. E aumento den e sector di “Transporte” a ser causa principalmente door di un aumento di 4.2% den e categoria “Gasto relaciona cu uso di vehiculo di transporte personal”, causando un efecto di 0.35 ppt. E aumento den e sector di “Paña y sapato” a ser causa principalmente door di un aumento den e categoria “Paña” (13.6%), causando un efecto di 0.21 ppt. E aumento den e sector di “Comunicacion” a ser causa door di un aumento di 29.3% den e categoria “Ekipo di telefon y fax”, causando un efecto di 0.25 ppt. E caida den e sector di “Mobilario” a ser causa principalmente door di caidanan den e categorianan “Aparato pa uso domestico” (-7.1%) y “Herment y ekipo pa cas y hardin” (-8.7%), causando un efecto di respectivamente, -0.13 y -0.07 ppt.

Canasta di consumo

E canasta di consumo di e CPI ta consisti di 408 bienes y servicio. Compara cu april 2026, 49.8% di e bienes y servicionan aki a conoce un aumento di prijs causando un efecto di 1.65 ppt, mientras cu 32.6% ta mustra un caida di prijs, cu a contribui cu un efecto di -0.64 ppt y pa e restante 17.6% no tabatin cambio den prijs. Compara cu april 2026, prijsnan di bienes (1.4%) y servicionan (0.4%) a conoce aumento y a causa un efecto di respectivamente, 0.83 y 0.18 ppt riba e CPI di mei 2026.