Den e era cu nos ta bibando, unda informacion personal ta move via fronteranan libremente, e pregunta di ken ta responsable pa e proteccion di e data aki nunca tabata uno mas importante cu awo.

Pa Aruba, e contesta ta keda uno incompleto, y alertanan cu a bini dilanti den juni for di autoridadnan regulatorio Hulandes y di e forum Parlamentario di Reino mas halto, ta señala cu no por ignora e buraco aki mas.

Proteccion di data y privacidad te relaciona pero no mesun cos

E terminonan di privacidad y proteccion di data hopi biaha ta usa den contextonan similar, sinembargo nan no ta mesun cos y e distincion aki ta sumamente importante ora ta trata legislacion.

Privacidad ta un derecho humano fundamental; e derecho cu un individuo tin pa controla nan propio espacio, relacionnan y informacion. Proteccion di data ta e cuadro tecnico y legal cu ta aplica e derecho aki den practica. E ta goberna con organisacionnan, por ehempel gobierno, hospital, negoshi, institucion, ta colecta, warda, procesa y transferi bo informacion personal. E ta determina si hospital por comparti bo record medico cu un tercer partido, con largo un banco por keda cu bo record di transaccionnan y si un agencia di gobierno por transferi bo recordnan na otro pais sin bo consentimento.

Privacidad no tin hopi significado sin un sistema cu ta funciona pa aplica esaki. Proteccion di data ta loke ta duna privacidad di forsa y esaki ta unda Aruba actualmente no tin un cumplimento completo.

Reglanan riba papel pero buraco den practica

Aruba no tin un falta di base legal den e area aki. E isla su instrumento principal pa proteccion di data ta Landsverordening persoonsregistraties (AB 2011 no. 37). E ordenansa aki ta rekeri pa registronan di data personal keda estableci pa un proposito specifico, legitimo y ta duna residentenan un derecho significante: bao articulo 12, individuonan por pidi un rapport completo di nan data personal dentro di 1 luna; bao articulo 13, nan por pidi coreccion of te hasta pa deshaci di informacion cu no ta berdadero of ilegalmente wanta y articulo 16 ta permiti esnan concerni den e data haci peticion na corte di prome instancia si un controlador ta rechasa cumpli cu esaki.

E ordenansa tambe ta establece cu categorianan di informacion sensitivo manera religion, rasa, opinion politico, sexualidad y data medico por keda warda solamente si esaki ta estrictamente inevitable.

Na mesun tempo, e ley no ta mesun estatico cu hopi biaha nos ta asumi. A haci 5 amienda caba na Landsverordening persoonsregistraties desde su aprobacion original, un biaha na 2014, na 2016, na 2019, 2021 y mas recientemente bao AB 2024 no.8, cu e texto consolida actualisa na ultimo den Aruba su Centraal Wettenregister na maart di 2026.

Tin un mal concepto comun cu ta importante ma coregi. Den cierto ocasion, specialmente den informacion cu ta mira online, ta describi e ordenansa como uno cu no tin provision pa castigo. Sinembargo, Articulo 26 ta establece cu violacionnan di e ley su articulonan fundamental, cual ta cubri proposito di limitacion, seguridad di data, compartimento cu tercer partido y transferencia cu ta crusa frontera, ta castigable cu un boet di categoria 3. Esaki ta clasifica como un delito administrativo.

E problema den e caso aki no ta e ausencia di regla of castigo. E problema ta e ausencia di un persona o autoridad suficientemente independiente pa aplica nan. Aruba no tin un autoridad dedica na e proteccion di data y supervision ta cay na e minister di Husticia y Seguridad, sin un cuerpo independiente pa ricibi keho, investiga violacionnan of emiti decisionnan cu peso legal. Riba papel, violacionnan ta carga e consecuencia, pero den practica, no tin un mecanismo pa aplica of persigui nan.

E buraco structural aki a haya atencion practicamente simultaneo for di e autoridad regulatorio di Hulanda y tambe e forum parlamentario di Reino.

Dia 2 di juni, autoridad di proteccion di data Hulandes, Autoriteit Persoonsgegevens (AP), a entrega un conseho formal na Secretario di Estado Hulandes, describiendo e panorama di proteccion di data den e paisnan di Caribe Hulandes, Aruba, Corsou y Sint Maarten como uno cu te ainda mester di trabao. E autoridad a adverti cu nivelnan di proteccion ta keda atras di manera significante compara cu standardnan internacional y cu supervision independiente efectivo tambe ta ausente.

Dianan despues, manera hopi di nos porta ta corda y Bon Dia Aruba a reporta, IPKO na Den Haag a trata e tema aki, bao titulo di basisbescherming persoonsgegevens, como un punto central riba agenda. E topico prome a bin dilanti na IPKO organisa na Aruba, unda cada pais a entrega un rapport formal. E resultado colectivo di esaki tabata cu proteccion den Reino ta diferencia di manera significante entre e paisnan, produciendo nivelnan desigual di proteccion.

IPKO mes a ilustra e problema aki como un topico di seguridad, no solamente uno legal. Pa Aruba, combati trafico di droga, labamento di placa y trafico humano ta depende riba compartimento di data cu partnernan den Reino. Cualkier barera na esaki no ta un problema legal so, e ta un menasa practico na seguridad publico manera a splica anteriormente.

Un dimension concreto di AP su advertencia ta reforsa e preocupacion aki. Bao Union Europeo su General Data Protection Regulation (GDPR), e paisnan Caribense den Reino ta clasifica como tercer pais. Den termino legal, esaki ta nifica cu transferencia di data for di Amsterdam na Oranjestad por ehempel, ta mira di mesun manera cu si mester transferi data for di Amsterdam pa Washington, pues ta considera esaki igual na transferencia di data pa fuera di e union. Sin un decision adecua of salvaguardia ekivalente, e transferencianan aki ta rekeri areglonan pa cada caso individualmente, cual ta complica mas ainda e cooperacion rutinario entre partinan Europeo di Reino cu e partinan Caribense.

E ausencia di un autoridad pa proteccion di data no ta algo cu ta solamente tecnico. Cuerponan di supervision independiente ta opera di cerca for di structuranan politico, nan ta monitor cumplimento den tanto sector publico como priva, y ta aplica e consecuencianan cu ley ta permiti di manera formal, cual den e caso aki Aruba no por haci. Esaki ta duna ciudadanonan un canal accesible y concreto via cual nan por eherce nan derecho.

Evaluacionnan anterior di AP a nota cu e leynan di proteccion di data di Aruba, Corsou y Sint Maarten ta similar di manera structural na Wet bescherming persoonsgegevens and Wet persoonsregistraties di Hulanda, e predecesor di GDPR, cual a reemplasa precisamente pa motibo cu nan no tabata adecua mas pa e era digital cu nos ta bibando. E cuadronan cu ta goberna e paisnan Caribense no a pasa den un reforma comparable.

E resultado ta bira cu negoshinan internacional cu opera na Aruba cu ta procesa data di ciudadanonan di e Union Europeo mester cumpli cu standardnan di GDPR of enfrenta supervision di exterior. Residentenan di Aruba, ken su data no ser maneha di manera adecua pa institucionnan local, no ta conta cu un proteccion ekivalente. Un ley ta existi, pero e cuerpo pa aplica esaki no.

AP a haci yamado na ambos Den Haag y gobiernonan di Aruba, Corsou y Sint Maarten pa traha den cooperacion riba un nivel comparable di proteccion den henter Reino, y a anuncia cu lo intensifica monitoreo di fluho di data den Caribe mientrastanto, mientras cu IPKO anteriormente a laga cla cu e no lo tuma un posicion ainda riba si un rijkswet ta e instrumento adecua pa implementacion. E legisladornan kier un contesta prome.

Mientras cu e cautela aki ta uno rasonable, tempo ta sigui core y riesgo ta sigui aumenta.

Pa Aruba, Landsverordening persoonsregistraties ta provee un fundeshi legal y 5 ronda di amienda ta mustra cu e legislacion no ta uno inactivo. Sinembargo e cuadro ta refleha un generacion di pensamento di proteccion di data for di cual Hulanda mes a aleha varios aña atras. Loke ta necesario cu urgencia ta un institucion independiente cu tin e autoridad pa duna forsa y aplicacion na e reglanan aki.

Establecimento di un autoridad di data dedica, of te hasta examina si un mecanismo di supervision por sirbi Aruba, Corsou y Sint Maarten colectivamente, mester bira un prioridad legislativo.

Batimento di alarma regulatorio di AP, IPKO su participacion parlamentario y GDPR su clasificacion di Aruba a haci juni di e aña aki un luna di crea presion pero tambe oportunidad na mesun momento.

Como ser humano cu tin derecho, nos merece tin e confiansa cu ora nos comparti nos record medico, entrega documento na oficina of institucion di gobierno, of provee informacion financiero na un negoshi local, tin mas cu un declaracion ministerial ta para entre nos data y su mal uso.

Den un mundo cu cada biaha mas ta impulsa pa data, proteccion di data no ta un luho regulatorio mas. E ta un fundeshi cla di gobernacion y un condicion pa e confiansa cu gobierno mester gana y mantene, cu e pueblo na cual nan e ta sirbi.