Financial Intelligence Unit Aruba (FIU-Aruba) a emiti un alerta na comunidad pa un tipo di fraude online conoci internacionalmente como “task scam”, un schema cu ta usa promesanan di ganashi facil pa hinca personanan den un trampa financiero.

E fraude ta yega principalmente via WhatsApp, Telegram, SMS of otro aplicacion di chat, unda personanan ta ricibi un oferta pa gana placa simplemente door di duna “likes”, evalua producto, mira video of completa tareanan online.

Segun FIU-Aruba, e oferta normalmente ta parce masha atractivo. E supuesto dunador di trabao ta bisa cu e trabao ta facil, por ser haci for di cas y cu bo lo ricibi comision pa cada tarea completa. Na comienso, e estafadornan tin biaha ta paga un suma chikito pa gana confiansa y haci e victima kere cu e sistema ta legitimo.

Despues di esey, e schema ta cambia. E participante ta mira cu su supuesto ganashi ta sigui aumenta riba un plataforma, pero ora e kier retira e placa, e ta ser informa cu e mester deposita su propio placa of manda criptomoneda pa libera e “ganashi”. E saldo cu ta aparece riba e cuenta no ta real. E ta solamente un cifra falso crea pa convence e victima pa sigui manda mas placa. Unabes cu un pago ta haci, e estafadornan normalmente ta sigui pidi mas fondo pa supuesto impuesto, costo administrativo of otro cargo cu nunca ta caba.

Autoridadnan internacional, incluyendo Federal Trade Commission (FTC) di Merca, a alerta cu e tipo di fraude aki a conoce un crecemento lihe durante e ultimo añanan. E schema ta probecha di e interes creciente den trabao for di cas y oportunidadnan pa gana un ingreso adicional.

FIU-Aruba ta bisa cu tin algun señal cla cu por indica cu un oferta no ta legitimo. Entre nan tin e promesa di un ganashi halto pa tareanan masha simpel, presion pa actua lihe, peticion pa manda placa of criptomoneda, y e exigencia cu bo mester paga prome pa por ricibi bo comision.

E regla principal ta simpel: den un trabao legitimo, e empleado ta ser paga. Nunca un empresa serio lo pidi pa bo deposita placa pa por traha of pa por ricibi bo salario.

Si bo sospecha cu bo ta enfrentando un task scam, FIU-Aruba ta recomenda pa stop inmediatamente cu cualkier pago y no manda mas placa. Tambe ta importante pa tuma contacto cu banco pa informa tocante e situacion y haci denuncia na Cuerpo Policial Aruba (KPA).

Cu fraude digital birando cada biaha mas sofistica, FIU-Aruba ta enfatisa cu e mihor proteccion ta keda alerta y verifica cualkier oferta di trabao cu ta priminti hopi placa pa poco esfuerso. Si un supuesto dunador di trabao ta pidi pa paga prome pa por haya e “ganashi”, e ta un indicacion fuerte cu bo por ta un victima di un fraude financiero.