Despues cu un caso di posibel venenamento na Pos Chikito a causa gran indignacion riba red social e siman aki, un otro caso di venenamento a bira viral. E biaha aki tabata trata di un sospechoso conoci den su comunidad na Paradera ta un persona cu frecuentemente sa venena tur tipo di bestia cu drenta su cura. E publicacion cu a surgi riba Facebook a inclui un potret di varios paloma morto poni den un rij, lagando hopi usuario den shock tocante e scala di venenamento cu ta tumando luga, supuestamente na man di e sospechoso acusa.

E publicacion a surgi den un grupo recien traha riba e plataforma social yama ‘Justice For Aruba Animals: Expose The Perpetrators now’, unda e creador di e grupo a haci un yamado pa expone agresornan cu ta opta pa venena of abusa di bestia.

Den su ‘post’ tocante e palomanan venena, autor a menciona cu e sospechoso ta un persona cu no sa mustra hopi compasion ni pasenshi pa bestianan cu por pasa banda of usa su cura. segun e post ta bisa, “cualkier cos bibo cu e ta considera fastioso, ta tribi di haci zonido, of laga excremento riba su tereno, den e area of—hasta den aire—, lo ser atendi cune den e manera mas hororoso.” Victimanan di e sospechoso sa inclui cacho, pushi y tur cos cu ta lastra riba suela of cu ta bula den aire, e autor ta bisa, unda e sospechoso sa usa veneno den cuminda pa asina mata e bestianan cu ta bin come den su cura.

Bon Dia Aruba a acerca e autor puntrando si a acerca autoridadnan caba. E autor a clarifica cu autoridadnan conoce e sospechoso caba, ya cu esaki no tabata e prome biaha cu ta batiendo alarma pa un caso di venenamento conecta cu e sospechoso. Segun e autor ta confirma, polis y servicionan veterinario tabata envolvi den un caso similar.

E biaha aki a splica cu e Inspector encarga cu tumamento di keho no tabata disponibel te ainda. Riba dia cu e caso aki a surgi, autoridadnan for di departamento di medio ambiente a pasa pa evalua e situacion y actualmente ta wardando pa polis caba di investiga e caso. Diahuebs polis a presenta na e tereno, segun e autor ta splica, pero e no sa ainda ki medida autoridadnan a tuma e biaha aki. En general, ora nan yama polis sa presenta pero casonan di venenamento rond e isla ta keda surgi, e autor ta bisa.

Campaña online pa expone abusadornan

E publicacion tambe a inclui varios detaye tocante e persona, casi identificando e sin menciona nomber. Y esaki ta parce di ta un decision intencional, ya cu e autor ta urgiendo usuarionan pa expone abusadornan di bestia. Segun e autor ta conta, den pasado exposicion online a causa acusadonan di muda pa otro bario of hasta sali fo’i e isla pasobra nan tabata keda ser enfrenta cu critica pa nan accion. Manera e creador di e grupo ta expresa, “nos no tin ningun otro opcion cu cuminsa protesta por medio di expone abusadornan te ora esaki stop!”

Y varios comentario bao e publicacion a expresa mesun sentimento. Algun usuario a haci yamado pa e sospechoso ser identifica, mientras otronan a sugeri pa pone presion directo riba e sospechoso.

A pesar cu por considera algun di e comentarionan problematico riba nan mes, tur ta mustra claramente cu ciudadanonan ta yegando un punto den frustracion unda ta kere cu mester tuma e situacion den nan mesun man pasobra autoridadnan responsabel ainda no ta poniendo suficiente presion riba abusadornan di bestia.

Campaña nobo di gobierno lo porfin kibra e ciclo vicioso?

Recien gobierno a anuncia un campaña nobo bao liderazgo di Ministerio di Salud, Cuido di Adulto Mayor y Maneho di Adiccion hunto cu Departamento di Salud Publico (DVG) unda lo enfoca riba promove doño responsabel di mascota, preveni abandono y regula animal riba caya segun leynan existente. A pesar cu no a duna mucho detaye ainda tocante e campaña, gobierno a reconoce cu e problema no ta solamente toca bienestar di animal, pero tambe ta toca seguridad publico, salubridad y calidad di bida di pueblo. Tambe a reconoce cu e problema no ta algo cu a aparece di un dia pa otro; e ta resultado di un cultura di abandono, criamento descontrola y iresponsabilidad di doñonan.

Sinembargo, e pregunta central ta keda si gobierno lo porfin duna un solucion sostenibel na e problema di bestia riba caya. Den pasado a mira varios medida caba pa atende e asunto, entre otro creacion di un Centro di Control di Cacho, campaña di conscientisacion, microchip y sterilisacion. Pero ningun a atende e raiz di e problema, y cacho y pushi riba caya ta keda un preocupacion grandi.

Pero kisas e pregunta no ta si tin legislacion adecua, sino si tin aplicacion adecua. Aruba tin e Ley di Cacho caba cu ta establece responsabilidad pa doño di mascota y ta duna autoridadnan hermentnan legal pa atende doño iresponsabel. Pero ta cla cu ta existi un gap ainda entre legislacion y aplicacion. Y e pregunta cu hopi hende tin pa cu esaki ta dicon?

Un posibilidad ta cu a pesar tin ley, no tin recurso suficiente pa aplic’e adecuadamente. Kisas no tin suficiente agente pa haci chekeo den bario of no tin infrastructura pa atende e cantidad di cacho y pushi riba caya. Si esaki ta e caso, e raiz di e problema ta bira no cu no tin iniciativa di gobierno, sino cu gobierno no ta invertiendo suficiente pa departamentonan concerni eherce nan trabao adecuadamente.

Pueblo ta consciente cu e problema mester un solucion structural. Campañanan grandi no ta nifica mucho si no tin inversion adecua pa departamentonan concerni atende cu e problema na un manera sostenibel. Di otro banda, e reconocemento di gobierno ta duna un señal prometedor cu ta compronde cu no por resolve e asunto simplemente door di kita animal for di caya despues cu e daño ya ta haci.

Pues ta keda di mira ki resultado e campaña nobo lo duna y si di berdad gobierno lo por tin un solucion duradero y kibra e ciclo vicioso.