Algemene Rekenkamer Aruba (ARA) a logra 73,77 punto di 100 den su prome participacion den un evaluacion regional di disponibilidad di informacion publico, poniendo Aruba na posicion 14 entre e institucionnan di control fiscal evalua den Latino America y Caribe. E resultado ta clasifica ARA den nivel “bon”. E estudio ta subraya resultado fuerte den fiscalisacion, pero a identifica falta principalmente den publicacion di plan institucional y informacion presupuestario.

E resultado ta aparece den e rapport nacional di juli 2026 di ‘Índice de Disponibilidad de Información a la Ciudadanía sobre la Gestión Institucional de las Entidades Fiscalizadoras Superiores’, conoci como IDIGI-EFS. E iniciativa ta ser desaroya conhuntamente pa Organizacion Latinoamericana y del Caribe de Entidades Fiscalizadoras Superiores (OLACEFS), mediante su Comision Tecnico de Practica di Bon Gobernacion, y Corporacion Accion di Ciudadano di Colombia. Su meta ta evalua cuanto informacion e institucionnan supremo di control ta pone na disposicion di publico y con facil ciudadano por haya, compronde y uza e informacion.

Pa Aruba, e evaluacion tin un significado particular, pasobra ta prome biaha cu ARA ta participa den IDIGI-EFS despues di su incorporacion reciente na OLACEFS. Consecuentemente, no tin resultado anterior di Aruba pa compara cu midi di 2017, 2018, 2019, 2021 of 2023. E 73,77 punto di 2026 ta un punto di salida cu por ser uza den futuro pa determina si transparencia, rindimento di cuenta y acceso na informacion ta mehorando.

E informacion evalua tabata esun disponibel riba e portal di ARA entre 13 y 15 di mei 2026. Resultado preliminar a pasa despues door di un proceso di validacion cu e ekipo tecnico di Rekenkamer, pa verifica evidencia y haci e adaptacionnan necesario conforme e metodologia regional. Esaki ta importante, pasobra e evaluacion no ta midi calidad di tur trabao cu Rekenkamer ta haci, sino principalmente disponibilidad y accesibilidad publico di informacion tocante su funcionamento y actividadnan di control.

Den e ranking regional presenta den e rapport, ARA ta aparece na posicion 14 cu 73,77 punto. E categoria “Bon” ta cubri score entre 70 y 89,9 punto. E nivel mas halto, “Optimo”, ta aplica na resultado entre 90 y 100. E promedio regional indica den e grafico ta 92,82 punto, mientras varios institucion di control di paisnan cu a participa a logra 100 punto.

Segun e evaluacion, e clasificacion “Bon” ta nifica cu informacion cu ARA ta suministra tocante alcance y resultado di su gestion institucional di control tin un nivel adecuado di informacion y rindimento di cuenta. E informacion disponibel ta ofrece material cu ciudadano y otro parti interesa por uza pa sigui y controla gestion publico.

Ora mira e resultado mas detaya, sinembargo, diferencia importante ta aparece entre e seis categoria evalua.

ARA a logra 15 di 15 punto pa su marco institucional y 20 di 20 pa fiscalisacion. Structura organisacional a logra 9 di 10 punto. Rindimento di cuenta di ARA na ciudadania a haya 15,77 di 20 punto. E dos resultado mas abao ta den politica y plan institucional, cu 8 di 20 punto, y presupuesto institucional, cu 7,5 di 15 punto.

E rapport ta considera particularmente e diferencia den politica y plan institucional y presupuesto manera un señal cu tin informacion importante cu ainda no ta suficientemente disponibel publicamente. Di otro banda, den fiscalisacion e resultado a cumpli completamente cu e balor spera, mientras den rindimento di cuenta na ciudadano ainda tin espacio pa fortalece transparencia y comunicacion.

Den e area di politica y plan institucional, por ehempel, e evaluacion ta recomenda publica mas informacion concreto. Esaki ta inclui lista di e posicionnan di trabao y salario aplicabel na funcionario y sirbidor publico di Rekenkamer, procedemento pa contratacion di consultoria specialisa, plan di capacitacion di personal, politica institucional tocante igualdad di genero y no discriminacion y informacion tocante capacitacion pa aplicacion di codigo di etica y otro norma di conducta.

Segun e evaluacion, tambe tin informacion importante cu ainda no ta disponibel riba e portal, entre otro e Plan di Accion Institucional, e actividadnan inclui den e plan y e departamentonan responsabel pa nan ehecucion. Mesun cos ta conta pa e Plan Anual di Fiscalisacion y e criteria y procedementonan uza pa elabora e plan. Ademas, e portal por amplia informacion tocante obhetivo di auditorianan di institucion of programa gubernamental, tipo di auditoria cu ta ser realisa y tipo di control cu ta ser aplica.

Presupuesto ta otro area cu e rapport ta subraya. Entre e informacion cu e estudio ta recomenda pone na disposicion di publico ta presupuesto anual di e aña anterior, presupuesto aproba pa e aña actual y distribucion di e asignacion presupuestario vigente.

Rindimento di cuenta tambe tin espacio pa mehora. E evaluacion ta recomenda pa pone tanto e rapport di gestion di aña anterior como e rapport tocante ehecucion di presupuesto na disposicion di publico. Ademas, e kier mas claridad tocante aporte cu ciudadano ta haci na proceso di auditoria, incluyendo denuncia, participacion den preparacion di plannan di fiscalisacion, participacion den auditoria y siguimento di recomendacionnan pa mehora e institucion.

Ademas di mira si informacion ta disponibel, edicion 2026 di IDIGI-EFS a inclui un evaluacion mas detaya di experiencia di ciudadano ora di uza e website. E analisis ta basa parcialmente riba criterio deriva di e norma internacional WCAG pa accesibilidad di contenido riba internet. Evaluadornan di AC-Colombia a nabega e portal for di perspectiva di un ciudadano cu ta busca informacion tocante gestion di ARA.

Riba e punto aki, e portal di ARA ta ricibi evaluacion positivo pa su structura simpel, ordena y funcional. E diseño ta facilita nabegacion y un parti significativo di e contenido ta directamente den formato web, en bes di depende solamente riba documento PDF. Esaki ta ser considera un punto fuerte pa accesibilidad. Sinembargo, gran parti di rapportnan di auditoria y otro documento tecnico ainda ta den PDF, loke por limita acceso si e documentonan no ta cumpli cu standard tecnico necesario.

E estudio no a identifica claramente herment visible pa usuario adapta tamaño di texto, contraste of uza nabegacion asisti. P’esey, e recomendacion ta pa ARA incorpora opcionnan di accesibilidad y gradualmente cumpli cu standard WCAG 2.2, incluyendo version web accesibel di documento importante.

Otro punto ta actualidad di e informacion. E rapport ta reconoce cu publicacion y rapportnan di auditoria ta organisa di un manera ordena y generalmente cronologico. No obstante, no semper ta inmediatamente cla ora un seccion of contenido a ser actualisa. E recomendacion ta pa inclui fecha visible di publicacion y actualisacion y pa distingui mas claramente entre informacion vigente y informacion historico.

Idioma y complehidad di e informacion tambe ta ser menciona. Aunke e structura di e website ta ser considera cla y facil pa lesa, hopi rapport di auditoria ta tecnico y no semper tin un resumen prepara den idioma mas comprendibel pa ciudadano. Ademas, uzo predominante di Hulandes y Ingles por forma un barera pa un parti di e publico. E rapport p’esey ta recomenda resumen ehecutivo den idioma cla, un splicacion cla tambe tocante importancia di e rapportnan y strategia di comunicacion multilingual pa amplia acceso.

Na nivel visual, portal ta ser considera lihe, simpel y facil pa nabega. Pero e mesun simplicidad ta limita uzo di grafico, infografico y otro herment interactivo cu por yuda ciudadanonan sin conocemento tecnico compronde mas facilmente informacion compleho. E recomendacion ta pa combina e diseño actual cu mas visualisacion di dato y opcionnan pa personalisa presentacion di contenido.

Den su recomendacionnan final, IDIGI-EFS ta pone enfasis riba un politica mas activo di transparencia. Esaki lo implica publica sistematicamente e plan anual di fiscalisacion, plan di accion, obhetivo y metodo di auditoria, informacion presupuestario y rapportnan anual di gestion. E estudio tambe ta recomenda pa ARA brinda mas claridad tocante con aporte y denuncia di ciudadano ta ser trata, y con ta duna siguimento na participacion di publico den proceso di control.

Finalmente, e rapport ta mira entrada di Aruba den OLACEFS manera un oportunidad pa Algemene Rekenkamer Aruba intercambia experiencia cu otro institucion di control den region y uza resultado di 2026 manera un base pa establece metanan concreto pa mehora. E meta pa futuro, segun e documento, ta aumenta tanto cantidad como calidad di informacion publico, fortalece confianza di ciudadano y eventualmente move di nivel “Bon” pa nivel “Optimo” den proximo evaluacionnan.