Aruba ta preparando pa refinancia centenares di miyones di florin den debe existente cu ta madura na 2027, cu minister di Finanzas, Geoffrey Wever reuniendo cu inversionista internacional na Europa e siman aki.
Segun un comunicado di gobierno, un total di Afl. 941 miyon den debe existente mester ser paga back na 2027. Gobierno tin intencion pa usa Afl. 84 miyon di su surplus den presupuesto pa e suma aki, mientras ta spera di cubri e resto mediante un combinacion di refinanciamento di institucionnan local y inversionista stranhero.
Minister Wever a atende e Private Placements Industry Forum Europe 2026 (PPIF-Europe) na Amsterdam dianan 15 y 16 di september. E conferencia ta trce hunto inversionista institucional internacional y ta duna Aruba un oportunidad pa presenta su outlook economico y fiscal prome cu su necesidadnan financiero.
E minister tabata spera di tene reunionnan individual y den grupo chikito cu inversionista existente y potencial.
Segun e comunicado di gobierno, e meta ta pa amplia e base di inversionista di Aruba y ricibi feedback di mercadonan financiero, y busca condicionnan faborable pa refinanciamento futuro.
“Pa un necesidad di refinanciamento di debenan di pasado di Afl. 941 miyon, Aruba no ta bay mercado sin ta bon prepara,” minister Wever a bisa.
Gobierno ta bisa cu refinanciamento di debe existente bao condicionnan mas faborable por yuda reduci costo di financiamento y contribui na baha e ratio di debe-pa-GDP di Aruba, cu ta proyecta pa yega na 59 porciento pa fin di 2027.
Aruba tambe ta buscando pa diversifica su fuentenan di financiamento. Mientras su base di inversionista internacional tradicionalmente tin presencia fuerte na Merca, gobierno kier reforsa relacion cu inversionista Europeo tambe.
Anteriormente, minister Wever a participa den PPIF-Europe na 2025, y PPIF Miami anteriormente e aña aki,c omo parti di strategia di gobierno pa mantene contacto cu inversionista prome cu Aruba mester drenta mercado pa financiamento.
