Netflix lo publica un serie documental di 3 parti tocante e desaparicion di Natalee Holloway na Aruba. Den “Taken: Natalee Holoway”, su mama Beth Holloway ta conta su storia tocante e caso cu a lansa Aruba den noticia mundial na 2005. No a anuncia un fecha pa su première ainda.
E hoben di 18 aña a disparce dia 30 di mei na 2005 durante un trip di graduacion na Aruba. E no a presenta pa su vuelo di regreso pa Merca. E buskeda y investigacion criminal cu a sigui a ricibi atencion di media internacional extenso pa varios aña.
Segun Netflix, e serie nobo tin varios imagen cu anteriormente no a publica y grabacionnan, y tambe lo tin entrevista cu investigadornan y personanan cercano na Holloway. E creadornan tambe ta bisa cu e ta cubri elementonan di e investigacion cu anteriormente no tabata publico. E serie ta dirigi pa Dani Sloane y Matthew Galkin. Story Syndicate ta productor di e serie.
Un parti importante lo ta e declaracion di Joran van der Sloot na Merca na 2023 tocante loke segun e a sucede cu Holloway. Esaki a tuma luga como parti di un caso criminal Mericano den cual el a declara su mes culpabel na extorsion y fraude via internet contra Beth Holloway. El a ricibi un sentencia di 20 aña den prison pa esaki. Como parti di e acuerdo aki, a rekeri Van der Sloot provee informacion completo y berdadero tocante e desaparicion di Natalee.
Van der Sloot nunca a keda condena na Aruba pa Holloway su morto, y tampoco a haya e victima su curpa.
Cu esaki, e serie di Netflix ta pone atencion internacional back riba Aruba y e manera cu a haci e investigacion e tempo ey, cual awo ta mas cu 20 aña despues di e desaparicion.
Netflix originalmente a anuncia e produccion aki na 2025 y recientemente e luna aki a bolbe trece e serie dilanti.
Un pagina di Netflix awo tin e titulo “Taken: Natalee Holloway”, pero no tin un fecha di lansamento ainda.
