Durante ceremonia di apertura di proyecto BESS II, WEB N.V. a anuncia cu lo instala un centro di almacenamento di bateria energetico cu meta pa warda energia renobabel y uza esaki pa yena e buraco cu ta surgi ora demanda ta surpasa suministro actual. BESS II ta sigui e proyecto piloto di BES I y ta anticipa cu e facilidad lo keda cla pa 2028.

E sistema BESS II (Batery Energy Storage System) ta diseña principalmente pa warda energia renobabel genera pa biento y solo pa ora cu mester di esaki. Cu un output maximo di 32 MW (megawatt) y un capacidad di 70 KWh (megawatt pa ora), e facilidad di bateria lo por suministra un maximo di 32 MW pa dos ora stret. Compara cu BES I instala na 2017, e facilidad nobo aki por suministra 31 MW mas (BES I tin output maximo di apenas 1 MW cu capacidad di 4 MWh). WEB a confirma den un comunicado cu e facilidad aki lo ta esun mas grandi den henter Caribe.

BES II no ta simplemente un generator nobo, pero tin e tarea di tuma y warda un cantidad mas grandi di energia di biento y solo pa ora Aruba mester di dje. Manera WEB mes ta splica, no tur biaha tin energia di biento y solo disponibel pa cumpli cu demanda halto. Na mes momento, por pasa cu energia di biento y solo ta ser produci sin cu Aruba mester di dje. Hopi biaha e cantidad di energia aki ta scapa pasobra no tin luga pa ward’e. Pero cu BESS II ta ampliando espacio pa warda e coriente aki pa ora si tin mester di dje. Aunke e facilidad lo por teoreticamente suministra 32 MW di coriente pa dos ora, e no ta nifica cu lo distribui full e capacidad den un solo golpi. Operacion di e facilidad lo depende di condicion di grid, demanda, con hopi energia renobabel tin genera y con WEB mes ta bay maneha e sistema.

E instancia a splica cu e facilidad di almacenamento lo keda integra hunto cu sistemanan cu tin actual, incluyendo e wind y solar farms, motornan di RECIP y turbinanan di gas. Segun a splica, lo implementa un maneho di automatisacion cu lo “determina continuamente cua fuente di coriente ta mas efectivo pa uza na cualkier momento.”

E facilidad nobo aki ta forma parti di e meta pa Aruba su suministro di coriente ta 50% proveniente di energia renobabel, segun WEB ta splica. Pa ciudadanonan, e proyecto nobo por significa mehoracion den suministro di coriente. Den e ultimo añanan, Aruba a mira varios blackout principalmente pasobra e grid nacional no por a cumpli cu demanda halto di hogarnan. Cu e anuncio di e proyecto aki, ta spera cu esaki por remedia e problema persistente aki, specialmente durante temporadanan di calor extremo.