CUA preocupa pa falta di accion di gobierno contra actividad comercial informal

Comerciante Uni Aruba (CUA) a expresa preocupacion creciente tocante competencia entre negoshinan cu ta cumpli cu nan obligacionnan legal y fiscal y esnan cu ta opera den mercado informal sin registracion, permiso of pago di belasting. Presidente di CUA, Frans Ponson, a splica durante un conferencia di prensa cu e problema no ta nobo, pero cu segun señalnan cu e organisacion ta ricibi di su miembronan, e situacion ta bira cada biaha mas dificil pa comerciantenan formal. Su yamado principal na gobierno ta pa pone mas enfasis riba aplicacion di leynan existente.

Ponson a dedica su conferencia di prensa na loke CUA ta considera un desigualdad den mercado. Segun e presidente di CUA, comerciantenan registra tin cu carga cu gastonan manera belasting, BBO, permiso y otro obligacionnan relaciona cu operacion di un negoshi, mientras cu nan por encontra competencia di persona cu ta ofrece producto of servicio sin carga cu e mesun gastonan.

E topico ta uno cu e sector comercial a bin ta trece dilanti pa hopi aña. Ponson a indica cu pa alrededor di dies aña gremionan ta papia cu diferente gobiernonan tocante mercado informal y falta di control, sin cu, segun CUA, a logra un solucion pa e problema.

E preocupacion ta bira mas serio ora comerciantenan formal ta haya dificultad pa competi cu prijsnan den mercado. Ponson a splica cu algun miembro di CUA a indica cu clientenan ta considera nan prijsnan mucho halto compara cu esunnan di otro proveedor cu den algun caso ta resulta cu e competencia no ta registra oficialmente of no ta cumpli cu e mesun obligacionnan fiscal cu un negoshi formal.

Pa CUA, esaki ta pone comerciantenan formal den un posicion dificil. Un negoshi cu ta paga su obligacionnan mester incorpora diferente costo den su prijs, mientras cu un operador informal por ofrece un prijs mas abao precisamente pasobra parti di e gastonan aki no ta existi p’e.

Ponson a indica cu e situacion a yega na un nivel unda algun miembro di CUA a presenta denuncia of “fraudemelding” cerca Departamento di Asunto Economico y Departamento di Impuesto tocante competidornan cu no ta registra of no ta declara actividad comercial. Pero lamentablemente, segun el a indica, e comerciantenan no ta mira accion despues di entrega e keho.

Esaki ta crea, segun CUA, un pregunta fundamental pa e comerciante cu si ta cumpli: con e mester sigui competi si no ta percibi cu e mesun reglanan ta ser aplica na tur operador?

“Keda legal y cera bo lugar? Of bira ilegal y sigui cu e negoshi habri,” Ponson a pone como e dilema cu, segun e, algun comerciante ta enfrentando.

CUA ta enfatisa cu su posicion no ta contra actividad economico chikito como tal, sino contra e diferencia den cumplimento y control. Segun Ponson, actividad comercial cu ta cay bao di obligacionnan legal y fiscal mester opera bao di condicionnan comparable, independiente di tamaño di e negoshi.

E tema di economia informal ya a aparece anteriormente den debate publico na Aruba. Un investigacion presenta na gobierno ta indica cu economia informal tabata calcula na aproximadamente 19.7% di Producto Interno Bruto (GDP). E estudio tabata relaciona cu trabao di profesor Friedrich Schneider y drs. Jason Lejuez. Gobierno tabata trahando cu un Programa Nacional pa combati economia informal pa periodo 2024-2027.

Mas recientemente, na juli di e aña aki, economia informal a forma parti di consulta entre gobierno y Camara di Comercio (KvK). Durante un reunion cu Minister di Finanzas, Asunto Economico y Sector Primario, Geoffrey Wever, a trata importancia di reduci economia informal y fortalece cumplimento cu reglanan vigente. KvK a presenta tambe un iniciativa pa un campaña di conscientisacion tocante economia informal.

Ponson, sinembargo, ta pone enfasis riba e parti di aplicacion y control. Segun e, Aruba ta un pais chikito y no mester ta dificil pa autoridadnan identifica actividad comercial cu ta opera afo di e sistema. El a cuestiona con, den un isla chikito, actividadnan cu ta conoci den comunidad por sigui opera sin intervencion.

Como ehempel, el a menciona benta di producto via internet. Segun Ponson, actividad comercial ta tuma lugar diariamente riba internet y e tema aki tampoco ta nobo. Pa CUA, despues di hopi aña di discusion, mester tin mas claridad tocante ken ta responsable pa control y con e control ta ser ehecuta.

El a a menciona tambe otro sectornan unda actividad informal of iregular ta visibel, incluyendo vivienda y transporte. Ponson a menciona autonan cu nummerplaat A ta ser gehuur na turista. Su argumento ta cu si actividad asina ta ampliamente conoci, autoridadnan competente tambe mester por investiga si e ta cumpli cu leynan y permisonan aplicabel.

Ponson a haci un yamado pa considera un taskforce dedica na control fiscal y actividad comercial informal. El a enfatisa cu no ta suficiente pa enfoca control principalmente riba companianan cu ya ta registra y consecuentemente ta facil pa autoridad identifica.

CUA ta cuestiona ademas e manera cu sistema ta trata e persona cu ta sigui e proceso formal compara cu esun cu nunca a drenta den e proceso. Ponson a uza aplicacion pa permiso como ehempel. Segun e, un persona cu solicita permiso y ser nenga ta conoci pa autoridad y por ser controla si e ta sigui cu su actividad. Sinembargo, un competidor cu nunca a solicita permiso por keda afo di e proceso administrativo y, segun e percepcion di CUA, tin biaha ta sigui opera sin intervencion.

E resultado, el a señala, por ta un incentivo contrario na loke gobierno lo kier logra. E persona cu ta purba di cumpli cu regla por enfrenta costo, tardansa, negacion of sancion, mientras cu esun cu keda completamente afo di e sistema por tin un bentaha competitivo.

Pa cambia e dinamica aki, CUA ta propone pa gobierno no solamente sanciona incumplimento, sino tambe crea mas beneficio pa esnan cu ta cumpli. Ponson a menciona e posibilidad pa comerciante cu ta paga belasting corectamente y consistentemente haya cierto beneficio of incentivo. E idea ta pa haci mercado formal mas atractivo y demostra cu cumplimento tin un bentaha concreto.

E yamado ta bin den un momento cu gobierno ta trahando riba diferente reforma. Durante e reunion entre Minister Wever y KvK na juli, a papia entre otro di simplificacion di procesonan administrativo, modernisacion di sistema di permiso empresarial y reduccion di burocracia.

Pa CUA, sinembargo, un parti importante di e problema ta cu Aruba tin ley y regulacion, pero falta aplicacion y control adecuado. Ponson a critica e tendencia cu tur gobierno nobo cu sinta kier introduci cada biaha legislacion nobo mientras, segun su evaluacion, aplicacion di regulacion existente ta keda atras.

El a menciona diferente ehempel cu apart di comercio tambe, incluyendo regulacion relaciona cu cacho y uzo indebido di parking pa persona cu discapacidad, ta ilustra su argumento cu aprobacion di un ley no ta suficiente si despues no tin control constante.

Segun e presidente di CUA, gobierno mester pone mas atencion riba ehecucion di loke ya ta estableci, en bes di mira legislacion nobo como e solucion principal pa cada problema. Pa Ponson, un periodo di varios aña enfoca principalmente riba aplicacion di leynan existente por contribui mas na un solucion di diferente problema cu introduccion continuo di regulacion nobo.

E preocupacion central cu Ponson a expresa ta cu tolerancia prolonga di mercado informal por eventualmente cambia comportamento di comerciantenan formal. Si un empresario ta percibi cu cumplimento ta trece costo adicional mientras falta di cumplimento no tin consecuencia, e interes pa sigui cumpli cu e sistema formal por disminui .

CUA ta bisa cu precisamente esaki mester ser evita. E organisacion no ta pidiendo pa comerciantenan formal bandona nan obligacionnan, sino ta exigi pa autoridadnan crea condicionnan unda cumpli cu ley no ta pone un negoshi den desbentaha.

Segun Ponson, e señalnan cu CUA ta ricibi ta indica cu problema a bira mas urgente durante e aña aki. El a indica cu for di su punto di bista mercado informal a sigui crece e aña aki, aumentando frustracion entre empresarionan cu ta paga belasting y cumpli cu otro obligacionnan.

Pa e gremio, e siguiente paso mester ta un reaccion concreto di gobierno riba con e ta pensa fortalece control, con instancia competente lo trata denuncianan y con por evita cu actividad comercial no registra ta sigui competi cu negoshinan formal.

E pregunta cu CUA ta pone dilanti gobierno finalmente ta keda mescos: kico un comerciante cu ta cumpli cu tur su obligacionnan mester haci ora e no por competi mas cu un operador cu no ta carga cu e mesun costo? Pa Ponson, e contesta no por ta cu e comerciante formal simplemente mester acepta e situacion of cera su negoshi. CUA ta sostene cu gobierno mester aplica e reglanan existente di un manera cu ta crea condicionnan igual pa esnan cu ta participa den mercado.