(Infobae) – Morto di alias Robinson Gutierrez, identifica como lider politico y financiero di structura Teofilo Forero Castro, perteneciente na Segunda Marquetalia lidera pa alias Ivan Marquez, a keda confirma.
Via su cuenta oficial riba X, Presidente Abelardo de la Espriella a bisa cu e operacion a ser ehecuta den aldea El Cadillo, den municipio di Tello, departamento di Huila. Ehercito Nacional, Polis Nacional y Forsa Aeroespacial a participa den e accion.
E tambe a confirma cu e operacion a dal Segunda Marquetalia di Ivan Marquez y cu alias Robinson Gutierrez, lider di structura Teofilo Forero Castro, a ser mata.
“Algun minuut pasa, den aldea El Cadillo, na Tello (Huila), un operacion di Ehercito Nacional, Polis y Forsa Aeroespacial a dal Segunda Marquetalia di Ivan Marquez. Alias Robinson Gutierrez, lider politico y financiero di structura Teofilo Forero Castro, a ser elimina,” el a bisa.
Presidente Abelardo de la Espriella a bisa cu alias Robinson Gutierrez, kende el a describi como un “criminal”, supuestamente tabata involucra den asesinato di senador Miguel Uribe Turbay, cu a sucede na 2025. P’esey, e hefe di Estado a afirma cu e no lo stop di exigi pa tur berdad tocante asesinato di e senador di Centro Democratico keda estableci.
“E criminal aki ta involucra den asesinato di Miguel Uribe Turbay. Mi no lo stop di exigi pa establece tur berdad tocante e crimen ey,” el a bisa.
Segun informacion publica pa Abelardo de la Espriella, alias Robinson Gutierrez tabata dirigi extorsion y menasa contra campesino, reclutamento di menor y accionnan terorista contra poblacion civil y forsanan di seguridad na Huila y Caqueta.
E presidente a sigura cu e operacion a laga tres miembro di Segunda Marquetalia deteni.
“Robinson tabata dirigi extorsion y menasa contra campesinonan, reclutamento di menor y accionnan terorista contra poblacion civil y Forsa Publico na Huila y Caqueta. Tres miembro mas a ser deteni,” el a bisa.
E presidente Colombiano a indica riba su cuenta oficial riba X cu resultado di e operacion ainda ta preliminar. El a agrega cu e lo amplia e informacion unabes verificancion termina.
“Esaki ta un resultado preliminar. Mi lo amplia e informacion ora verificacion termina,” Abelardo de la Espriella a bisa.
Minister di Interior, Rodrigo Lara, tambe a reacciona riba morto di alias Robinson Gutierrez y a sigura cu habitantenan di Huila y Caqueta por respira mas trankil.
“Habitantenan di Huila y Caqueta por respira mas trankil cu neutralisacion di alias Robinson Gutierrez, lider peligroso di Segunda Marquetalia, experto den extorsion y parti di e structura criminal cu a mata Miguel Uribe,” el a bisa.
Minister di Interior a felicita Forsa Publico pa e operacion, Minister di Defensa Jorge Mora y Presidente Abelardo de la Espriella.
Declaracion di comandante di Forsanan Militar
Forsanan Militar Colombiano a informa cu nan a neutralisa alias Robinson Gutierrez, identifica como lider politico y financiero di structura Teofilo Forero Castro di Segunda Marquetalia, durante un operacion den area rural di Tello, Huila.
Segun informacion publica pa Mayor General Erik Rodriguez Aparicio, comandante di Forsanan Militar, tres supuesto miembro di e structura arma tambe a ser deteni durante e operacion.
E accion a ser ehecuta pa tropanan di Ehercito Nacional, via Forsa di Despliegue contra Menasanan Transnacional, cu sosten di Forsa Aeroespacial Colombiano y Polis Nacional.
