Ministerio pa Asuntonan Interior y Asuntonan di Reino no ta bay duna ningun declaracion riba e informe cu tanto Corsou como Aruba a nenga pa avion priva di Maria Corina Machado por a crusa nos espacio aereo pa bay Venezuela. Asina Secretario di Estado pa Asuntonan di Reino Eric van der Burg a bisa recientemente durante su conferencia di prensa mensual. Segun van der Burg, a dicidi den Conseho di Minister di Reino cu si mester bin un declaracion di Gobierno di Reino riba e tema, cu esaki lo sosode pa medio di Ministerio pa Asuntonan Exterior, kende por lo pronto no a duna splicacion di motibo tras di e decision.
Manera ta conoci, e informe a lanta hopi conmocion, particularmente mirando cu a usa awanan teritorial di e dos islanan pa a saca e lider di oposicion di Venezuela for di e pais pa e por a biaha pa Noruega y ricibi su premio Nobel di Paz. Es mas, tabata autoridadnan di Reino mes kende a facilita e proceso hunto cu forsanan militar Mericano, pa asina Corina Machado por a yega Corsou y subi avion pa biaha pa Noruega.
Sinembargo, e condicionnan na Venezuela a cambia di tal indole, cu ya ta mustra cu Gobierno di Donald Trump, kende por cierto a ricibi e Premio Nobel for di man di Maria Corina Machado, no ta interesa pa instala of sostene e posicion cu lider di oposicion tin un papel di hunga den gobernacion di Venezuela. Mientras cu a priminti cu ta bay tin eleccion pronto, Gobierno Mericano mas bien a reconoce Delci Rodriguez como Presidente di Venezuela y ta trahando directamente cu su gabinete, cu a bay de acuerdo entre otro pa saca oro Venezolano for di e pais, y deposita esaki na Merca, ademas di areglonan di petroleo cu awor ta bou control di Merca tambe. Tur esaki mientras cu ainda ta considera Maria Corina Machado como profugo di ley na Venezuela. Van der Burg ta reconoce si cu e situacion ta hopi delicado, y como tal e ta keda na Ministerio pa Asuntonan Exterior, den consulta cu Gobierno di Corsou y Aruba pa haci un declaracion.
Asina mes, Gobierno di Reino ta cla pa normalisa tur relacion cu Venezuela, incluso a nombra un funcionario den e posicion como Embahador di Reino na Caracas. Eric van der Burg. Manera ta conoci, Prome Minister Hulandes Rob Jetten entre otro a saca potret cu presidente di Venezuela durante reunionnan di Asamblea General di Nacionnan Uni. “Poco poco ta tumando paso pa normalisa e relacionnan cu Venezuela. Nos como Reino mester mira con e islanan Boneiro, Corsou y Aruba por fungi como hub direccion Venezuela y otro paisnan di Sur America, den cuadro di MercoSur.” Segun e Secretario di Estado, tin interes di companianan pa inverti den Venezuela, pero no ta sinti hopi confia pa establece na e pais. Y di e forma aki, e islanan ABC por tin un papel grandi di hunga pa companianan Europeo.
En todo caso, van der Burg un biaha mas a mustra su satisfaccion cu Aruba a responde despues di e temblornan na Venezuela, unda e por a mira con bon e ayudo for di Aruba tabata organisa, for di Cruz Cora te otro organisacionnan. Pa loke ta e sosten na Venezolanonan na Aruba, cu a cay afo desde e decision di Merca pa stop tur ayudo humanitario, autoridadnan na Aruba no a haci ningun yamada na Hulanda pa asistencia. Esaki, mientras cu ta conoci cu Gobierno di Aruba a tuma e decision pa permiti refugiadonan registra nan mes, pa asina haya un permiso di estadia y di trabou temporario, pa asina por entre otro por registra na Censo. “No a bin ningun ningun peticion di Aruba direccion di Hulanda.”
Locual si ta sigui ta financiamento pa continuacion di e landspakket pa Aruba, cu tin luz berde di Gabinete di Hulanda y cu awor ta pendiente aprobacion di Tweede Kamer.
Oro Hulandes
Gobierno Hulandes tin un papel minimo di hunga den e traslado di e oro Hulandes for di Merca, cu awor ta reparti na institucionnan entre otro di Inglatera. Locual si ta haci ta asisti islanan BES den e proceso aki. “E decision di traslada oro Hulandes for di Merca ta puramente uno di Banco Central di Hulanda cu ta hiba e maneho monetario.” Riba e pregunta si tin conseho pa Gobierno di Aruba riba e tema, van der Burg a bisa cu na Aruba tambe e ta un asunto di Banco Central di Aruba y no ta algo cu e por comenta riba dje.
Conferencia di Reino
Pa loke ta Reino Hulandes mes, van der Burg a reitera palabranan di Rey Willem-Alexander durante Prinsjesdag cu e Conferencia di Reino cu ta tuma luga na Sint Maarten na November lo defini miho e relacionnan entre e paisnan. Van der Burg no a elabora riba e pregunta si lo atende cu e punto di deficit democratico. “E obhetivo di e Conferencia di Reino ta pa e cuater paisnan siña di otro y determina cua ta e temanan cu mester atende cu ne,” van der Burg a enfatisa. “Awor aki ambtenaarnan ta trahando riba e agenda, cu te ainda no ta determina. E mester ta puntonan cu nos tur lo kier delibera riba dje. E ta un comienso y asina nos lo mira con pa reforsa Reino Hulandes.”
