(AFP) – Megaraket Starship di SpaceX a yega den orbita pa prome biaha y a desplega 26 satelite prome cu e a baha den Oceano Pacifico dialuna, logrando un paso importante pa e nave espacial den desaroyo cu ta clave pa e plannan ambicioso di Elon Musk.
E raket grandi, color preto y plata y mas cu 120 meter halto, a lansa for di base di SpaceX na Texas trempan dialuna mainta cu e meta pa yega orbita y pasa alrededor di 10 ora biahando rond Tera.
Despues di separacion exitoso y bahada di booster Super Heavy, parti superior di Starship a yega den orbita, pero solamente despues cu algun problema cu motornan a causa duda si e mision por a continua.
“Starship ta den orbita,” un miembro di team di lansamento a bisa durante un transmision live, mientras empleadonan di SpaceX presente a celebra.
Algun minuut despues, e nave a cuminsa desplega satelitenan Starlink di generacion nobo, agregando na e constelacion grandi di internet via satelite cu ta representa un fuente importante di entrada pa e compania.
Despues di solamente alrededor di tres ora di vuelo, ingenieronan di SpaceX a tuma decision pa saca e nave for di orbita y laga e baha den Oceano Pacifico.
E transmision live a mustra e parti superior den posicion vertical bahando rapidamente door di atmosfera, prome cu motornan a cende di nobo pa baha velocidad di su descenso pa awa.
Despues cu Starship a toca awa verticalmente, e raket a parce bira riba su banda y despues a ser envolvi pa un explosion grandi. Musk kier pa Starship un dia por ser reutilisa rapidamente, aterisando riba plataformanan cu lo gara e raket prome cu e toca tera of awa.
Mas reto ainda dilanti
Despues di varios aña di desaroyo y prueba na Texas, SpaceX a cuminsa bula Starship den su configuracion completo na 2023 y desde e tempo ey a haci hopi modificacion basa riba tanto exito como fayo durante su pruebanan.
Pero ainda tin retonan tecnico enorme prome cu Starship por cumpli cu e meta di Musk pa yega Luna y hasta Marte, incluyendo demostra cu e nave por ser yena cu combustibel mientras e ta den orbita.
NASA tambe ta conta riba un version modifica di Starship pa misionnan cu tin como meta hiba astronautanan Mericano back riba superficie di Luna.
Kathleen Curlee, analista senior na Center for Security and Emerging Technology di Georgetown University, a bisa AFP cu prueba di dialuna no tabata “super exitoso”, pero si a logra progreso significante.
Expectativanan publico
E plan original tabata pa e raket termina su biahe den Oceano Pacifico despues di seis orbita, pero finalmente e a logra solamente dos vuelta rond Tera.
Booster grandi di prome etapa, mientras tanto, a baha den lamanan pafor di costa di Texas, cu SpaceX scogiendo pa no intenta trece e back na base. Compania anteriormente a logra gara e booster exitosamente back na base cu e brasanan conoci como “chopsticks” di plataforma di lansamento.
For di punto di bista di ingenieria, “solamente logra vuelo y colecta dato” ya por ser considera un exito, Curlee a bisa prome cu lansamento.
Pero publico y inversionistanan tin expectativanan diferente.
Desaroyo di Starship a enfrenta retraso repetidamente, y un compania Chines recientemente tambe a logra progreso den area di raket reutilisabel. Ainda asina, SpaceX ta sigui domina mercado global di lansamento espacial, danki na su raketnan Falcon parcialmente reutilisabel, y e compania a haci tuma riesgo parti di su manera di traha.
Como señal di su posicion lider, prueba di Starship lo ser sigui e siman aki pa tres otro lansamento di raket SpaceX, di cual un lo carga un ekipo di astronautanan pa Stacion Espacial Internacional.
