Conflicto riba CAO di Arubus ta afecta transporte publico mientras trahadonan ta prepara pa escala nan accion di protesta

Transporte publico na Aruba a ser afecta considerablemente dialuna mainta despues cu trahadonan di Arubus a tuma accion laboral den nan conflicto prolonga tocante un contrato colectivo di trabao (CAO) nobo. Segun sindicato SEPPA, e conflicto ta draai rond di un structura salarial nobo, condicionnan laboral y e recursonan financiero necesario pa yega na un acuerdo. E desacuerdo, cu ta andando pa varios aña caba, a afecta un biaha mas servicio di transporte publico considerablemente ayera mainta. Despues di e accion di protesta, trahadonan a anuncia cu nan ta prepara pa escala e accion si e situacion no cambia.

E accion di dialuna mainta a afecta gran parti di servicio di transporte publico y tambe transporte escolar. Segun medionan di comunicacion local, secretario general di sindicato SEPPA, Magaly Brito, a indica cu e situacion ta consecuencia di un proceso cu ta pendiente pa basta tempo, mientras trahadonan ta buscando un CAO nobo cu ta inclui, entre otro, un structura salarial nobo y mehoracion di nan condicionnan laboral.

Negociacion pa e CAO nobo a cuminsa na comienso di e aña aki. Segun informacion divulga anteriormente, SEPPA y gerencia di Arubus a sinta na mesa y a logra cierto comprendemento riba varios punto. E obstaculo principal, sinembargo, ta keda e aspecto financiero.

Segun SEPPA, Arubus no tin suficiente espacio financiero pa implementa tur e cambionan cu ta forma parti di negociacion sin sosten adicional. Pa e motibo ey e sindicato a acerca gobierno pa trata disponibilidad di fondo, pero segun Britto, te ayera no tabatin e reaccion cu e trahadonan tabata spera.

Gobierno di Aruba ta unico accionista di Arubus. E relacion aki ta importante den e conflicto, mirando cu capacidad financiero di e compania ta directamente relaciona cu posibilidad pa yega na un acuerdo tocante salario y otro condicionnan laboral.

Segun SEPPA, tanto Gobierno como gerencia di Arubus mester tuma un rol mas activo den e proceso pa logra cu negociacion por sigui dilanti. E sindicato ta sostene cu durante hopi tempo trahadonan ta tende cu no tin suficiente fondo of cu e posicion financiero di e compania no ta permiti implementacion di nan exigencianan.

Dialuna mainta trahadonan di Arubus a bolbe organisa un accion laboral. Esaki no ta prome biaha cu e trahadonan di Arubus ta organisa accion di protesta, den pasado ya nan a yega di protesta pa asuntonan relaciona cu nan salario y condicionnan di trabao. Durante e protesta, servicio di transporte publico a keda fuertemente limita. Algun empleado cu ta traha bao di otro tipo di contrato a sigui presta servicio, pero segun SEPPA, e impacto tabata amplio y transporte publico a keda practicamente para.

Transporte di scol tambe a ser afecta. Esaki a amplia consecuencia di e conflicto pa studiante, mayor y famianan, ademas di e pasaheronan cu tur dia ta depende di Arubus pa yega trabao of otro destinacion.

SEPPA a reconoce cu un interupcion di transporte publico ta causa inconveniencia pa comunidad. E posicion di sindicato, sinembargo, ta cu trahadonan ta buscando progreso concreto den un conflicto cu no a haya un solucion definitivo pa hopi aña.

E problema no ta nobo. Na juli 2024 trahadonan di Arubus a pone nan trabao plat pa aproximadamente dos ora den un disputa relaciona cu structura salarial.

E tempo ey, representante sindical a indica cu discusion tocante un structura salarial nobo tabata andando desde 2017. Di otro banda, gerencia di Arubus a señala cu desde 2019 a traha riba un sistema nobo di escala salarial y descripcion di funcion.

Un di e puntonan principal tabata e diferencia tocante financiamento di e cambionan. Gerencia a indica e tempo ey cu Arubus no tabatin suficiente espacio financiero pa carga su so cu un aumento salarial considerable.

Director di Arubus e tempo ey a splica na juli 2024 cu e Service Level Agreement entre gobierno y Arubus no tabatin espacio pa cubri un aumento salarial substancial. Segun e posicion presenta e tempo ey, sosten financiero adicional di gobierno lo ta necesario pa por implementa cambionan cu ta trece gastonan considerable.

E situacion financiero di e compania tabata tambe un tema importante. E tempo ey a bin dilanti cu Arubus tabata confronta debe fiscal y otro obligacionnan financiero. Esaki a limita e margen cu gerencia tabata bisa cu e compania tin pa atende demanda salarial sin sosten adicional.

Di banda di trahadonan, nan ta sostene cu dificultadnan financiero di compania no por sigui impedi mehoracion di nan condicionnan laboral. E punto aki a keda pendiente sin cu partidonan a logra yega na un acuerdo definitivo.

Un aña despues, na juli 2025 e CAO di empleadonan di Arubus a vence mientras cu ainda no a logra yega na un acuerdo riba un CAO nobo. E asunto a ser trata durante un reunion entre representante di SEPPA, shopstewards y minister Arthur Dowers.

Durante e discusion ey a bolbe bin dilanti e necesidad di fondo. Un compromiso anterior di ex-minister di Transporte Ursell Arends pa pone Afl. 500.000 adicional disponible pa Arubus no a concretisa.

Despues di e accion di dialuna mainta, e conflicto a conoce un desaroyo adicional. Segun Brito a indica na un medio di comunicacion local, trahadonan a dicidi pa escala nan accion diahuebs si no bin un cambio den e situacion.

Brito a confirma cu e decision a ser tuma despues cu, segun SEPPA, ni gerencia di Arubus ni gobierno a reacciona den e forma cu trahadonan tabata spera despues di e accion di mainta.

Detayenan exacto di e siguiente accion ainda mester ser determina y comunica, pero esaki por nifica cu transporte publico lo enfrenta un otro interupcion, posiblemente uno cu lo por dura mas largo.

SEPPA a indica cu si bin un reaccion positivo di gerencia of gobierno, trahadonan por reuni atrobe pa evalua situacion. Un cambio of cancelacion di e accion lo ser determina den consulta cu e empleadonan.

Segun e sindicato, intencion di e accionnan no ta simplemente pa paralisa transporte publico. E meta ta pa crea presion pa partidonan bolbe sinta na mesa di negociacion y busca un acuerdo cu por ofrece mas claridad y seguridad na e trahadonan.

Esaki ta pone e atencion un biaha riba e pregunta di con un eventual CAO nobo lo ser financia. Si e posicion financiero di Arubus no ta permiti e compania carga cu tur e cambionan, participacion di gobierno como accionista lo ta un elemento importante pa por sali for di e impasse actual.

E conflicto tin consecuencia cu ta bay mas leu cu e relacion laboral dentro di Arubus, mirando cu hopi persona ta depende tur dia di transporte publico. Un interupcion di servicio por afecta directamente studiante, trahado y otro pasaheronan cu ta uza bus pa nan actividadnan diario.

E desaroyonan anterior di e conflicto ta mustra cu pa yega na un solucion no ta suficiente pa sindicato y gerencia simplemente logra yega na un acuerdo riba contenido di e CAO. E aspecto financiero tambe ta hunga un rol importante, mirando cu implementacion di cambionan salarial ta depende di recursonan cu Arubus tin disponible.

Segun SEPPA, despues di varios aña di discusion, e trahadonan kier mira un solucion concreto pa e asuntonan pendiente. Sinembargo, durante e negociacionnan, situacion financiero di Arubus ta keda representa un di e obstaculonan principal pa yega na un acuerdo.

Pa awor, no tin indicacion cu un acuerdo definitivo a ser logra. E siguiente desaroyo lo depende di si gerencia di Arubus y gobierno presenta un reaccion cu por crea espacio pa bolbe sinta na mesa pa sigui negocia.